周柏豪教菊梓喬着紅底轉運

東方日報
·2 分鐘文章
柏豪與菊梓喬一齊舞獅迎牛年,期望新一年事業更旺。
柏豪與菊梓喬一齊舞獅迎牛年,期望新一年事業更旺。

連續3年奪「最受歡迎女歌星」的菊梓喬,祈求牛年愛情與事業兼得,喜獲周柏豪做「月老」,為她牽紅線,同門隨時親上加親。柏豪私授「紅底轉運法」,又讚她才是公司「No.1」,謙稱非「阿哥」之輩。

出爐無綫歌王、歌后的周柏豪與菊梓喬(Hana),齊齊打響鑼鼓,舞動醒獅迎新年。人夫柏豪表示受疫情影響,今年多留家過節,但一樣照派利是:「好彩科技先進,可以用電子貨幣轉數,利是可以照派嘅。」未收過他大利是的Hana預先「留名」:「你有我電話號碼,你派畀我先啦!新年你都係匿埋屋企,怕撞唔到你。」

心急結婚生B

被柏豪取笑「大胃口」的Hana,新一年有更大想頭,就是破Dry搵筍盤結婚生B,令人生更圓滿:「我都想派利是畀佢囡囡,但係要結婚先。」隨即爆柏豪應承做媒人,介紹未婚的胞兄或胞弟給她,不過男方似縮沙說:「介紹畀你識,冇話咩o架!」她即說:「你嗰次唔係咁講!」

談及過年習俗,柏豪說:「每年都會換一批新內褲。」Hana問:「咁你着邊款內褲?」被尋根究「底」的他嚇一跳說:「咪着正常男人會着嘅內衣褲囉。」為免再惹誤會,Hana急澄清:「諗住粉絲可以送畀你。」續稱因未試過着紅底過年,才好奇一問,柏豪教她:「年廿八洗邋遢時換晒舊嗰啲內衣褲,有送舊迎新嘅意思。」

唔敢做一哥

提到他們是唱片公司的「一哥一姐」,柏豪謙稱:「我冇分過一唔一、二唔二,哥同姐都好,夾埋一齊,Hana點都係No.1。」女方即搶住認細:「冇呀,平時叫你豪哥o架,我好尊敬前輩。」柏豪哈哈笑說:「我年紀就大過佢,係佢先咁講。」

過去鼠年,柏豪因疫情關係少做運動,自覺健康較差:「加上世界又有啲壓力,搞到好多病痛走晒出嚟,又有舊患,唔做運動感覺有啲老化,所以新年希望身體健康。」而Hana除了想有桃花運,又希望唱歌及演戲方面有新嘗試。

柏豪打鼓有姿勢有實際。
柏豪打鼓有姿勢有實際。
菊梓喬最愛農曆新年,可以攞正牌狂食賀年食品。
菊梓喬最愛農曆新年,可以攞正牌狂食賀年食品。