周身毛洩蜜 馬國明湯洛雯築愛巢湊仔

視帝馬國明沾滿一身貓毛出席活動，大方透露與女友湯洛雯已築愛巢養貓，愛屋及烏的他讚小動物相當可愛，並指女友稍後離港半個月，他要負責留家「湊仔」。

無綫熱播劇《白色強人Ⅱ》收視報捷，首集跨平台收視高達21.1點，前晚一集直播亦錄得19.4點佳績，教台前幕後興奮不已。昨日演員郭晉安、馬國明、胡定欣及張曦雯（Kelly）等到太古城出席宣傳活動，邀得「香港結節性硬化症協會」會友撐場。當會友講述患病感受及成功爭取政府資助鏢靶藥，眼淺的Kelly感動到眼濕濕。

家住太古城的馬國明笑言：「行一陣就返到屋企。」期間他被發現T恤沾滿貓毛，他大方表示：「其實我同阿湯喺將軍澳租咗個單位，如果趕戲時就喺嗰度住，同埋疫情我都驚會傳染屋企人，所以有另外一個地方穩陣啲。阿湯養咗2隻貓喺嗰度。（同居？）你哋可以咁講嘅。」

胡定欣唔憎郭晉安

他大讚2隻小貓很黐身及可愛：「佢哋會跟住我去廁所，當我哋睇電視，佢哋又會喺隔籬趴喺度，好乖，搞到我都中咗貓毒。（當佢哋係仔女？ ）其實佢哋係一對夫婦，來自唔同家庭。」對於早前被指推劇，他再三澄清：「唔係推劇，好多謝公司趁《白Ⅱ》推出呢段時間，能夠放我出去搵真銀，已經接咗啲工作。（不如趁呢段時間拉埋天窗。）如果有好消息，我哋一定會講。阿湯嚟緊要去澳洲起碼半個月，我要留喺屋企湊貓就真。」

而定欣表示今次拍劇別具意義：「已經唔係演戲咁簡單，希望觀眾睇劇之餘引發思考，我哋能夠帶出正能量，了解罕見病患者。」安仔則指雖然劇集開拍前未有機會接觸病人，但他們不斷上網搜尋資料作參考，了解他們的日常生活、心態等種種問題。接下來的劇情交代希望成立藥物研發中心的定欣，與意圖開放藥物名冊的安仔各持己見，關係愈見緊張，記者問2人是否拍到「好憎對方」，定欣表示：「唔會，我哋靈性同EQ都好高。」