味之天使「香蕉」王淑玲租屋遇糾紛搵《東張西望》幫手 被撻訂損失6位數 近年轉做玄學家

有咩糾紛就梗係報《東張》啦，那怕你係玄學家。《東張西望》早前收到個求助個案，苦主Vanko原來係前TVB藝人、曾於《美女廚房》擔任味之天使「香蕉」嘅王淑玲（現改名王嫣辰）。

根據節目，想租村屋住嘅王淑玲早前睇中一間元朗三層高村屋，業主王小姐開價月租3萬6千元，Vanko同意並於去年11月簽臨時租約，仲俾埋一個月租金當訂金，雙方約定2月中交鎖匙。王淑玲話本來業主好照顧佢，但去到交鎖匙前一晚，佢睇到《東張西望》報導，得知可以查看物業業權，於是交鎖匙當日王淑玲要求查冊。一查之下，王淑玲發現租住嘅村屋原來有2個業主名，但租約只係得業主王小姐名字，經紀指另一業主係王小姐前夫。

即使法庭文件指王小姐擁有全幢村屋業權，但王淑玲唔放心，而且又發現物業涉及按揭，Vanko於是向業主要求出示出租同意書。此外Vanko再發現租約冇打釐印，可能會失效，但業主話唔打釐印先收嗰個租金。去到3月1日起租日，租約仍未簽妥，業主王小姐指王淑玲撻訂，沒收租金同王淑玲之前搬咗入屋嘅私人物品。Vanko估計因此損失超過12萬元。而王小姐以訊息向王淑玲表示「我最鍾意打官司」、「我夠膽殺你訂，我夠膽抌晒你啲嘢，因為我已經問咗兩個律師同一個大狀」。

東張主持俞可程致電業主王小姐了解，王小姐指Vanko「好多要求」、「要去到2月15日佢至會簽正式租約，只不過係話hold住呢個單位，叫我唔好租畀人」，同時否認拒絕租約打釐印至起租，更指王淑玲講大話。Vanko就喺節目表示會透過小額錢債審裁署追討賠償，另外佢喺IG發限動指「天理何在」、「對方唔願意配合苦主」。

王淑玲因演出TVB青春劇《盛裝舞步愛作戰》而入行，離開TVB後轉行做玄學家，聲稱可以提供紫微斗數、風水佈局、八字、奇門遁甲、文王卦及梅花易數等諮詢。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！