咀Edan百次緊張到斷片 Anson Lo感激神徒 唔認人氣最強

·3 分鐘文章
MIRROR每一員都重視「團魂」,Anson Lo亦不例外。
MIRROR每一員都重視「團魂」,Anson Lo亦不例外。

人氣男團MIRROR成員Anson Lo,憑ViuTV劇集《大叔的愛》爆紅,加上日前生日獲「神徒」落力應援,人氣急升冠絕全隊!對此,他昨日受訪時謙虛否認,表示未有留意Fans增加。他又透露劇中與隊友Edan咀足過百次,「初吻」後更緊張到「斷片」忘詞!

男團MIRROR紅到發紫,當中剛度過26歲生日的成員Anson Lo(盧瀚霆),近日憑劇集《大叔的愛》人氣再上一層樓,社交平台的追蹤人數突破37.4萬,是隊中人氣最強!他表示很開心獲關注,但未有留意Fans激增,談及「神徒」斥巨資鋪天蓋地為他慶祝,他說:「今年好好彩有好多人同自己慶祝生日,每人嘅支持都唔係必然,佢哋花時間關注我已經好多謝。今年係我其中一個最難忘嘅生日,神徒真係好有心。」

中環之吻撞親鼻

新劇收視節節上升,劇中他與隊友Edan上演一段BL「牧田CP」,更有不少親熱咀戲,他笑言與對方錫到厭:「錫咗好多Take,中環嗰場都錫咗廿幾三十Take,因為有時唔中鏡頭中間,個嘴又撞到佢個鼻,畫面上唔好睇,所以再嚟過。」他又「劇透」指共有3場咀戲,加埋NG錫了過百次,更自爆「初吻」後緊張到忘記對白:「未試之前好緊張,唔知會點,因為未試過。排機位嗰陣,我哋咀咗落去,冇猶豫、縮開或者『焗蟹』忍笑,但第一下錫完,大家畀反應講咗兩句之後,我就唔記得咗要講咩,好彩只係排機位。」

好兄弟共同成長

問到錫足過百次,可有令兩兄弟友誼加深?他笑言:「唔關事,劇組、監製搵我哋兩個,因為外形、性格脗合外,亦因為我哋真係好Friend。拍完之後嘅轉變係,大家共同經歷多咗,見證對方成長。好似早幾日同佢食生日飯講起,3年前參加《全民造星》拍《前傳》MV,喺旅遊巴上我哋咁啱一齊坐,而3年後我哋仲一齊做緊嘢。」

談及近日推出的劇集片尾曲《不可愛教主》,唱出主角「阿牧」對「阿田」的情感,MV更首度有女主角,Anson Lo笑言與陳漢娜第一次見面即頭貼頭很尷尬,問到下次會否錫女主角?他笑說:「唔夠膽想像,但要遇到好嘅歌同啱Feel,唔想為錫而錫。」另外,他與隊友Ian為旅遊發展局宣傳,發掘香港打卡靚景。

《大叔的愛》熱爆全城,將Anson Lo與Edan的人氣推至高峰。
《大叔的愛》熱爆全城,將Anson Lo與Edan的人氣推至高峰。
Anson Lo出巡打卡,叫Fans推薦香港景點。
Anson Lo出巡打卡,叫Fans推薦香港景點。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能