和解在後丨Ivy So與許寶恆被趙善恆點名力讚唔係靠樣 昆蟲爬頸除褲激大膽

ViuTV原創劇《和解在後》由COLLAR成員Ivy So（蘇雅琳）及趙善恆（恆仔）主演，岑珈其、李敏、谷德昭、何洛瑤（Sica）及許寶恆（Alice）等亦有份參演。呢次雖然係Ivy So首次孭飛擔任女主角，但表現一啲都唔失禮，除咗被觀眾激讚，更被導演趙善恆和駱子康公開點名大讚。

周二（28日）晚播出第二集，Alice有除褲及出浴鏡頭；Ivy So則要被真昆蟲爬上頸，二人專業程度令趙善恆於社交平台以「唔好成日聽人講系列：靚女淨係得個樣？」為題發文公開稱讚：「Ivy平日熟讀劇本捱更抵夜呢啲不在話下，今日Ivy昆蟲爬頸的一場戲，她是一口答應，而且沒有半點不滿，為咗滿足畫面效果非常搏命！而且當日35度天氣，片場係一個好污糟邋遢嘅舊工廠大廈，唔好話有無冷氣，連呼吸都有點困難。」至於Alice劇中角色會於脫毛療程中被燒傷下體，趙善恆表示Casting完當日先同佢講要除褲，當時已有種「估你唔到喎」嘅驚喜：「她沒有半點推搪或疑惑，也立即答應。」趙善恆更表示要兩位靚女拍枱講粗口除褲仲玩埋曱甴可能有點大膽：「但她們不但做到，而且做得好好！世界嘅標籤未必一定全部係真，要自己去親身感受去搵答案。」

透過試鏡得到機會嘅Ivy So，亦被導演駱子康大讚進步得好快，仲話全個劇組因為佢嘅天份同努力而驚呆：「香港拍劇從來都係好黐線嘅事，60幾日之內要拍完50幾組嘅戲，無得休息仲要一嚟就carry女主角，每日十幾個鐘連續咁拍，但從來未聽過佢講一聲『辛苦』，只係會笑住咁答『學嘢點會辛苦！』」。同劇演員谷德昭亦讚Ivy So好有天份：「演出方面，蘇媽好有天份，經驗咁淺，但係已經唔驚Cam，可以做到自然，已經唔容易，萬丈高樓從地起，有呢個根基，加上觀眾緣，從實戰中進步。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！