「和頭飯」反枱收場 林作母親下逐客令 裕美委屈爆喊

裕美(右二)泣不成聲,不過林母(左二)望都唔望,林作(左)則粒聲唔出。
裕美(右二)泣不成聲,不過林母(左二)望都唔望,林作(左)則粒聲唔出。

藝人裕美和林作母親隔空罵戰2年,終於有機會突破盲點擺「和頭飯」,裕美更釋出善意親自下廚,可惜「明月照溝渠」,被林母下逐客令兼寸到喊,深感委屈的她大數「未來奶奶」白鴿眼、老屈兼冇口齒,世紀和解變反枱收場!

曾離婚的裕美被林作母親嫌棄,指其出身、學歷、背景均配不上曾當律師的兒子,一直視她為眼中釘。裕美本想在風水師七仙羽主持的ViuTV節目中,和林母首次同枱食飯望「世紀破冰」。她未現身前,林母跟七仙羽以「失散一世姊妹」相稱,並漠視同枱的林作,問七仙羽可考慮做其新抱。

林作被指罪孽太深

節目預告片中,笑容滿面的裕美拿着一碟咕嚕肉現身,林母即變臉說:「我減肥,已經唔食都飽啦!」「和事老」七仙羽即說:「希望佢哋大家可以坐埋一齊。」而林作則露出「笠水」樣,之後裕美激動說:「唔好意思,我覺得好委屈囉!」林母霸氣反擊:「睇吓搵邊個請佢(裕美)出去啦!」搞到裕美爆喊,狀甚可憐。

之後七仙羽雙手合十不停唸經,她說:「我唸嗰本經嘅名叫『難唸的經』,每一家都有一本嘅!」又指林作罪孽太深,要化解「準婆媳」誤會就要打走林作身上的業障,隨即和裕美亂棒打到他背脊布滿棍痕。

「冤枉我條氣唔順」

昨日裕美受訪時表示,亮相節目只想林母於全港市民面前講憎她的原因:「問極佢都只係話我唔適合佢個仔,問題冇解決。」又指對方沒望過她一眼,過程深受委屈兼被「老屈」:「佢話林作有5萬蚊卡數係我用,但我一蚊都冇用,冤枉我咪條氣唔順!佢鍾意嗰啲女仔用幾多錢都值,我就一文不值。」更嬲爆指林母開工前一晚,以「唔想見裕美」為由拒拍攝:「應承咗就要做囉,我都好難頂,嗰日我喊到崩潰,心情沉咗2、3日。」而林作表示女友爆喊並非「做戲」:「全部係冇預測到嘅真實反應。」又坦言戥女友慘,不過這是她的選擇,而他只做「花生友」角色。

裕美坦言沒用林作錢,最憎被人老屈!
裕美坦言沒用林作錢,最憎被人老屈!
七仙羽叫裕美打走林作身上的業障。
七仙羽叫裕美打走林作身上的業障。