和風的味道 精選全港4大日式家庭料理咖啡店

講到日本料理,其實唔係淨得壽司、刺身、天婦羅同燒肉揀嘅。有時想食得輕盈啲,去啲裝修得溫馨別緻嘅日式咖啡店,食地道嘅日式家庭料理都係唔錯嘅選擇。今次介紹4間各有特色嘅和風家庭料理畀大家,感受下家鄉嘅味道!

復古咖啡室 呼吸星球

呢間咖啡店本身係一間位於旺角嘅樓上cafe,大半年前搬至土瓜灣。新店大玩港式復古風,因為餐廳前身係一間冰室,店主保留返卡座、招牌同吊扇等復古元素,加埋古董擺設,係幾有風味!食物方面就主要供應日式定食,如京蔥手打漢堡定食,漢堡肉以水香煎,口感鬆軟油脂豐富。另外柚子清湯石垣牛燉肉定食都係招牌之作,湯汁清淡肉味濃。仲有甜品同飲品,必試有玫瑰拿鐵同香蕉朱古力雪糕窩夫等,咖啡店迷要bookmark啊!

圖: eatislove
圖: eatislove

日式昭和風cafe 婆婆珈琲屋

食得嘅富士山!一新開就喺Instagram上洗版嘅人氣咖啡店,餐廳以富士山同獅子山為創作主題,將佢哋融入唔同菜式,希望可以為客人帶嚟視覺上同味道上嘅驚喜。晚市定食有四款,推介蜂蜜蘋果咖喱雞肉烏冬同北海道三文魚奶油燉菜定食,前者將蜂蜜同蘋果加入咖喱中,甜味自然更清新;後者濃厚之餘又唔會太膩。另外一定要追加富士山飯團,有明太子同三文魚兩款餡料,好食又啱相機食先~至於午市定食嘅冷菜、熱菜大都可以任意選擇,自由度更高~

圖: eatwithhangryal
圖: eatwithhangryal

母女檔主理日系cafe 日常

西營盤一帶一向都有唔少高質小店,呢間由母女檔主理嘅木系日式咖啡店同樣主打家庭式料理。菜單上選擇貴精不貴多,最受歡迎係呢款鹽燒鯖魚配雞肉軟骨串定食,定食包括沙律、免治雞肉軟骨串、日本鯖魚同茶漬飯。雞肉軟骨串惹味有咬口,鯖魚嫩滑重魚油香,最有驚喜係茶漬飯,上湯係店主用玄米茶加自家高湯調配而成,感受到鰹魚乾鮮味同茶嘅清香,配埋彈牙嘅珍珠米同明太子醬,成個味道好有層次。另外每日都會轉款嘅自家烘焙卷蛋都值得一試!

圖: connie0420
圖: connie0420

文青系咖啡店 屋子生活

呢間日系咖啡店位於馬鞍山,坐擁超高樓底同落地大玻璃,沿住落地玻璃旁更係榻榻米座位,採光度極高,坐喺度食飯,心曠神怡~日式定食選擇有超過十五款,如炭烤雞塊丼、吉烈豚扒丼同多款茶泡丼等,都係水準之上。甜品都好有人氣,好似沖繩紫薯窩夫,窩夫鬆軟有蛋香,配埋微甜嘅紫薯蓉同香草雪糕,味道唔會太甜。

圖: hk.foodpath
圖: hk.foodpath

文: Yanica