哥上太空，吃力不討好——辰來之筆(李辰安)

【星島日報報道】（作者李辰安，從事創作二十年，開拓城市感覺派文風，與讀者一起懷舊，穿越香港時空找尋生活新旨情。） 大家都在談中國上太空的話題，我以為又有火箭升空，殊不知，講的是電影八卦。 過去的春節電影檔期中，吳京再一次成為票房紀錄保持者，這與我何關？吳京電影未看過，這位大明星是甚麼樣子，我也經常搞錯。「安哥，大家講吳孟達，你識啦啩？」簡單交代一下，與周星馳老友鬼鬼幾十年的吳孟達，竟然不去繼續做「喜劇之王」，而是去吳京那部號稱中國科幻片代表作的《流浪地球》當配角，據聞本片有超過四十億元人民幣票房收入。 「恭喜達哥，今次真係『拋頭露面』囉（經典的《逃學威龍》對白，達哥把『出人頭地』成語張冠李戴），不過，你扮特異功能或者好啲，無端走入一部畀人非議的內地電影做乜吖。」 「Uncle Li，達哥做《流浪地球》年代的一名老司機。」哦，幾啱佢戲路。「你唔好諗錯隔籬，呢位太空版老司機並非成身會震嘅『三叔』嗰類角色，而是賺人熱淚之老角。」我跟公司幾位年輕人吹水，吹到上太空，其實，我又無睇過呢部戲，有乜好講？「各位，我上網見到好多人話，中國太空人電影係中國人自卑之表現，事實上，今時今時，你拍套中國人拯救地球的電影，可謂勇氣之作，若非中國有十幾億人，蝕到吳京上太空就有分。」 又唔係噃，美國矽谷嗰邊，人人爭住入場，中國太空片一票難求，上咗當地新聞，老外都話︰估你唔到……咁好睇。「細路，宣傳呢啫，講你又信。」中國太空人又點夠美國佬砌？荷里活幾十年前已經統治外太空，地球有難，除咗美國太空人之外，任何人拍心口去拯救，一是非法取得美國技術；二是侵犯美國多年之專利；三是有濫用民族主義之嫌。 中國還有好多頭痛問題未搞得掂，好多問題要改善，比如跨海大橋有無甩漏呀，高鐵有無令人暈車浪呀，如是種種方是中國當務之急，無端端上太空？仲要救地球，佩服吳京等內地電影人之想像力。 八十後同事問︰「翻拍美國經典《傅滿州》又如何？」細路，你窒我呀？使唔使咁極端去到呢個位呀？傅滿州眾所周知是對中國不友好的角色形象，搵你扮傅滿州，下屆奧斯卡金像獎提名你做影帝好唔好？我索性坐底，在茶水間開個臨時通識教育課。 「各位，我成長於上世紀七十年代，當年李小龍返香港拍電影震驚世界，何以李小龍可以受全世界人接受和歡迎？皆因李小龍一早在美國打好基礎。」年輕的同事們，你爸爸應該有睇過無線配音劇集《青蜂俠》，李小龍傍住大俠做助手加藤之美好形象，深入美國民心。李小龍的美國鄉里覺得他返香港拍功夫片，發揚了主持正義，打倒壞蛋的普世標準價值，美國父老感覺上︰「你睇加藤幾爭氣，未駛我哋青蜂俠、美國隊長出馬，已經搞好香港嗰邊秩序，Yeah！」 有同事舉手發問︰「李Sir，照你意思，你想話最好搵吳京做加藤？」我身旁冰雪聰明的女同事搶答︰「最好拍《新青蜂俠》，達哥做青蜂俠，星爺做加藤，導演記得要拍好嗰個飛腳踢爆吊燈鏡頭，星爺唔用替身實力演出，套戲唔爆棚就奇。」大家好有想像力，我其實想借李小龍做例子，說明角色恰如其分係好重要，中國未係做太空救世主的時候，阿爺都無話過要將美國取而代之，中國有好長時間要做老二——好好打，不過係助手，好似加藤咁同美國拍住上，先至包你有運行。 講下講下，老闆原來行咗入嚟沖茶，點解呀，秘書又告假？人到無求品自高，今時今日，一個連續幾年無加我人工之老闆，算得係乜咁巴閉，我叫聲你早晨，都係有莊有閒啦。「安仔，Wonderful，你講得好好呀，個個人好似你咁識諗，今年公司一定有人工加，有花紅分。」我與其他同事全部O嘴，勢估唔到老闆你講呢啲！ 老闆揸住杯茶，好有型咁企喺門口，說︰「去年點解公司條數唔係太理想，全國為中美貿易戰之威脅，好多客人睇唔定，唔知阿爺會否企到硬，逼使特朗普晒冷，搞出個大頭佛，所以公司生意做少咗。其實，阿爺一早以退為進，畀少少甜頭對方，情況就唔會咁壞。」明白，我哋無花紅分，無人工加，問題不在於領導公司的你，係中美貿易戰，而箇中糾結之處，在於阿爺唔識Do，係咪？我無理解錯誤。 「Anyway，所以教訓大家，千萬唔好同現實過唔去。安仔，我有個美國Phone Meeting，你同班後生仔，繼續溝通下。」同事們，大家都聽到老闆之言，之不過，唔使撐到咁遠，講返達哥上太空嗰部戲。我雖然未睇，不過我直覺上認為，如果劇情加番少少料，例如有個美國科學家同吳京合作，又或者有個美國太空顧問團加入，最後聯手搞掂拯救地球，你話幾好。 「Uncle，套戲係畀十幾億內地人欣賞，唔係照顧香港咁細個市場噃，你拍部中美合作拯救地球，分分鐘十幾億人鬧你，係唔係？」係，我同意電影有一定程度商業性，電影亦係為大家提供發夢內容的產品服務，不過，太過渲染一個偏頗見識，好容易習非成是，有礙大家獨立思考。 「李Sir，咁講，你批評埋近年香港諗埋一面嗰啲社會題材電影啫？」女同事加多句︰「你踩埋言論自由、 電影藝術自由之界線，好似好有問題噃。」 我絕無此意，我從頭到尾只係彈下中國人太空拯救地球之想法，好天真好儍，達哥最好勸下吳京，明年唔拍《新青蜂俠》都拍番套《新賭聖》賀歲，我包你票房再破紀錄。 唉，達哥六十七歲，你要佢穿太空衣上太空，不如大家嘻嘻哈哈好過啦。 眼見同事們無反應，算啦，晏晝我請大家食飯。剛才如有講得唔合各位心意，大家抹咗算啦！

睇更多