唐佳逝世︳雪妮婚後急流勇退 拍《天地豪情》復出 因耳疾失聰靠老公做「助聽器」

著名武指、資深藝人雪妮嘅丈夫唐佳（原名黃唐）尋日喺佐敦從大廈墮下身亡，終年88歲。唐佳生前同太太雪妮結婚逾半世紀，多年來形影不離，但近期雪妮罹患胰臟癌，需長居醫院接受治療。如今唐佳離世，令外界更擔心雪妮嘅狀況。

原名熊雪妮嘅雪妮生於1945年，17歲時加入電影圈，拍過唔少武俠片，代表作有《女黑俠木蘭花》。雪妮因為呢套戲深受歡迎之外，亦結識該片武術指導唐佳並開始交往。3年後雪妮與唐佳結婚後息影，二人育有兩子，一度移居加拿大。

雪妮離開娛圈廿幾年後，因獲TVB邀請而加盟，於首套拍攝劇集《天地豪情》中飾演陳錦鴻、周海媚及郭藹明三姊弟嘅媽媽。此後雪妮拍過多套TVB劇集，計有《創世紀》、《酒是故鄉醇》、《我的野蠻奶奶》等。雪妮復出後，唐佳經常陪太太開工，佳哥曾自稱係雪妮嘅經理人、阿四同埋保鑣。雪妮於2020年宣布息影，其中一個原因係一邊耳朵受遺傳病影響而失聰，更因此而要帶助聽器。雪妮曾表示老公唐佳成日陪住佢，即使聽唔到嘢都可以由佳哥代為解釋。

雪妮退休後鮮有公開露面，去年8月佢同唐佳與多名圈中人聚會。網上流傳當時照片中，雪妮同唐佳睇落仍然相當精神，而且面帶笑容。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！