唐詩詠同螢幕男友麵包店重逢「大家都成長了」 網民妙問︰你老婆知唔知?
唐詩詠早前喺銅鑼灣開設嘅麵包店成為逆市奇蹟,經常有顧客大排長龍。不過早前有網民喺內地社交平台小紅書發文,炮轟店員態度,身為老闆嘅唐詩詠發文為年青店員護航,解釋佢地只係20歲嘅年青人,亦有承認自己犯錯。
圈中人緣不俗嘅詩詠,時不時就有朋友光臨麵包店打氣。曾經同唐詩詠喺《楝仁的時光》及《鐵馬戰車》演情侶嘅袁偉豪,喺小紅書發文紀錄自己去詩詠間麵包店幫襯一事。「我就是那個痴痴地的施馬sir,終於有時間到你的麵包店支持,好久沒見大家都成長了」。見到袁偉豪現身,果然有人問「你那寶兒知道嗎?」,而袁偉豪就回覆「你覺得呢?」。
袁偉豪同唐詩詠因拍劇而熟絡,當年出席《楝仁的時光》宣傳活動時,仲試過應高層曾勵珍要求,喺觀眾面前即場錫嘴製造話題。唐詩詠2013年拍《載得有情人》同洪永城Tony撻著,袁偉豪亦係同劇演員之一,洪永城同袁偉豪同樣因為呢套劇而成為好友。洪永城同袁偉豪喺《兩個小生去camping》節目中自爆多年前試過帶當時各自嘅女友唐詩詠、岑杏賢一齊「四人約會」。袁偉豪仲提到自己得知洪永城同唐詩詠分手時「好開心」,因為知道唐唔適合Tony。