唔好得罪造型師 重溫藝人出事髮型
唔同臉型適合嘅髮型都唔一樣,一個好睇嘅髮型除咗可以顯瘦及減齡之外,仲可以令你自信double up,相反唔適合嘅髮型就會令你生不如死。無論係拍攝定出席公開活動,藝人們都會經常轉換髮型,不過就唔係次次都咁好睇,總會有發生髮型車禍嘅時候,不如而家就同大家數一數啦!
蔣麗莎
蔣麗莎(Lisa)與陳浩民婚後5年抱4,一家六口幸福美滿。近日蔣麗莎就喺抖音直播預先介紹佢嘅新發現,不過呢個髮色真係好蝦人,唔係個個都carry到。唔少網民睇完都紛紛負評,話佢睇落好老,似一個50幾歲嘅大媽,仲有口賤網民話佢可以用長者優惠添呀!
陳冠希
陳冠希(Edison)曾經係年青人嘅潮流指標,當年外貌更加係迷倒萬千少女。不過早前開直播同粉絲互動時卻老態盡現,滿面癦屎及深深嘅法令紋等嚇親唔少網民。近日佢喺社交網站上載為時裝品牌拍攝嘅相片,黑色背心配鮮紅色高腰褲嘅造型,加上呢個平頭look,唔少網民都唔受落,仲嘲笑佢似水喉技工。
馮盈盈
為咗配合劇集《反黑路人甲》嘅角色需要,馮盈盈剪咗個眉上瀏海嘅新髮型,不過呢個髮型似乎連佢呢位靚女都駕馭唔到,網民們仲話俾呢個髮型嚇親。
高海寧
備受無綫力捧嘅高海寧(高Ling),今年除咗劇接劇咁播出之外,當然就繼續接拍新劇啦!早前佢就接拍新劇《七公主》,劇中將會飾演麻甩女貨車司機顧青桐,佢不惜剪短頭髮及紮胸上陣,不過就被串好似男人。
黃宗澤
黃宗澤喺上年以一個全新髮型出席《2019香港國際影視展》,雖然呢個兩邊「剷青」嘅新髮型睇落幾清新,不過就被網民笑佢好似阿旺同埋卡通片《反斗小王子》入面嘅和真。
鍾嘉欣
鍾嘉欣喺無綫劇集《老友狗狗》戴上黑色眼鏡,再剪咗一頭短髮,唔少網民話佢同吳尊好似樣,不過呢個髮型令佢吸睛度大減,甚至連仙氣同星味都唔見埋~
陳豪
陳豪嘅髮型經常出錯,不過最離譜嘅都可以話係《使徒行者2》嘅凌亂長髮look。陳豪嘅額頭已經高,所以最啱佢應該係啲平實嘅髮型,咁樣就最有男人味啦!
薛凱琪
出道初期嘅薛凱琪(Fiona)曾經為無綫劇集《學警雄心》剪短頭髮,不過就因為咁而暴露咗頸長,仲俾網民笑似「長頸鹿」。
鄧佩儀
華姐冠軍鄧佩儀(Gloria)係唔少人心目中嘅女神,不過佢之後為劇集將頭髮越剪越短。雖然睇落係好清爽,不過就冇晒仙氣,連佢自己都話短髮時一個追求者都冇,留返長髮後追求者即刻返晒嚟!
G.E.M.
G.E.M.有一段時期係以Rock友形象示人,佢仲將自己左邊頭髮剷青,呢個造型原本已經唔係好多人可以接受到,仲將G.E.M.嘅包包面顯得更加突出。唔知G.E.M.係唔係知道呢個問題,所以佢喺影硬照時多數都係側面居多。
陳靜堯
2018年港姐佳麗經過髮型改造後,佢哋嘅髮型唔多唔少都會有啲變化,不過最搶眼嘅一定係8號嘅陳靜堯,大會為佢打造一個蓬鬆爆炸頭髮型。雖然呢個髮型令佢成為網民熱門討論話題,不過就令到好似老咗好多咁。