唔捱貴租 進駐大埔 陳煒擲千萬私己錢 買風水屋得米

陳煒坦言買入新翠山莊後,翌日即獲廣告商邀合作。
陳煒坦言買入新翠山莊後,翌日即獲廣告商邀合作。

「無綫花旦」陳煒貴為圈中富婆,跟隨兩大影帝高價入市,斥資逾千萬元圓業主夢。據知,她重錘出擊全因該區乃風水地,果然未入伙已有運到,工作不斷豬籠入水,短短半個月已有幾百萬進帳。日前她單拖現身傢俬店,與醫生男友隔空睇家品,愛情事業兩得意!

與男友過半同居生活的陳煒,有見影帝梁家輝、任達華、汪詩詩及「東張咪神」李旻芳等紛紛入市,儘管有投資者預測未來樓市會冧價3成,但陳煒認為千金難買心頭好,故樓價處於高峰期,也無懼出資入市!近日她由租客升呢做業主,用私己錢買入將重點發展的白石角區。

睇啱即扑槌

一直想置業的陳煒近年不停四出睇樓,可謂睇勻港九新界,惟未遇上合心水的單位。直至本月初終搵到筍盤,據知,她睇中大埔的新翠山莊,鍾情其環境清幽兼私隱度極高,加上有指2024年將食正「南山北水」地運,故首次睇樓便扑槌,豪擲逾千萬元買入近千呎單位。沒料買入不久,便獲悉新居地段將被重點發展,預料物業將會升值。她買入單位翌日,即不停有廣告工作送上門,包括健康產品、生髮維他命廣告等,就連已完約的米商也要求與她續約,估計幾個廣告收入高達數百萬。今次陳煒名副其實買正「得米風水屋」,未搬入已經旺到爆。

雖然尚未收樓,但陳煒日前已急不及待逛商場睇家具,單拖出巡的她不愁寂寞,走勻整個商場,期間到傢俬店試梳化及睇床,頻頻影相兼傳語音訊息,似乎隔空向醫生男友陳國強問意見。行到攰,她到餐廳坐低,點了一杯飲品後又拿起電話講不停,接着到停車場取車離開。

拒男友資助

陳煒棄男友資助改以私己錢置業,今次趁機入巿,她稱不想捱貴租:「租咗樓好多年,見啲租金不停加,就的起心肝買樓,用嚟投資或者保本都得,唔使再捱貴租。新居嘅環境好舒服,我覺得揀啱樓嚟買,好滿意。」不少明星愛此區風水旺而進駐,陳煒亦湊熱鬧搬入沾旺氣,她指購入單位後,風水屋隨即發揮作用,催旺事業,她開心說:「簽約翌日就收到電話話有廣告拍,短短幾個星期都不斷有新工作。(好眼光揀中風水屋?)真係咁啱,嗰度仲會起鐵路站出口,好方便!(做咗業主之後,有冇諗過實行人生第2個計劃,同男友結婚?)講真又未有呢個想法,因為我哋已經一齊住,感情好穩定,結婚對我嚟講唔係咁急切,依家呢種相處好舒服。」

陳煒物色枱櫈,頻頻撳電話與男友隔空商量。
陳煒物色枱櫈,頻頻撳電話與男友隔空商量。
買梳化當然要試坐。
買梳化當然要試坐。
陳煒坐低飲嘢都要同男友報到,認真癡纏。
陳煒坐低飲嘢都要同男友報到,認真癡纏。