唔見電話結姻緣?拍拖先知男友原來係賊仔
最司空見慣結識另一半嘅方法︰同事、同學、朋友介紹……好悶呀可?換著係咁,你又制唔制? 日本有位網友喺推特分享一個朋友嘅拍拖經歷。事主通知原post主即將結婚,仲講埋點樣識到呢位「如意郎君」。 有一次,事主喺街唔見電話,於是聯絡到執咗個電話嘅男子,見面交收之後又再約出嚟,就咁一齊咗。
浪漫得嚟都幾尋常呀,但係拍咗拖一輪,個男仔講出事情另一版本。 原來個男仔係偷咗部手機,後來發覺物主原來幾靚,一見鍾情…… 吓?即係「我的男友是個賊」?咁仲浪唔浪漫先?事主覺得……好感動!而且佢地結婚之餘仲有埋BB添,問你服未! 睇完個故事嘅網友,唔少都覺得成件事好詭異。有巴打分享類似經歷︰「我試過故意漏低手機喺我心儀嘅女子個手袋度,結果個電話攞唔返」。 呢個留言好適合round up呢件事︰「原來呢個賊仔,偷嘅唔係電話,而係偷心……」
畢竟都係大團圓結局,希望個男仔以後唔好再偷嘢啦。原文傳送門