商台宣布 鄭欣宜 x 盧瀚霆Anson Lo 拉闊音樂會11月中重臨 MIRROR 11/11打籃球賽

MIRROR喺7月演唱會事故後停工兩個月，今個月開始復工之後，星期一已經有新歌WE ALL ARE推出。而各成員嘅單飛工作亦相繼重回軌道。

其中由盧瀚霆Anson Lo同鄭欣宜合作嘅《拉闊音樂會 神の拉闊》，商台剛剛公布會喺11月13日舉行。呢場原定9月舉行嘅拉闊，由於演唱會事故而要改期。有份贊助嘅航空公司亦已經喺商台宣布後公布換飛安排。

商台另外一個本來9月進行嘅大型籃球活動《903 ALL STAR籃球賽》，由於MIRROR加埋ERROR已經佔歌星隊一半人數，故此同樣因為MIRROR休團而延期。今日商台同時公布活動會喺11月11日舉行。

早前有傳媒影到，Anson Lo同隊友Jeremy李駿傑趁住外遊返港改為0＋3檢疫措施，出發去韓國旅行，並且已經「轉場」飛埋去日本。今年單飛出道嘅Jeremy，同埋即將為拉闊準備嘅「教主」，返港之後應該又回到日夜顛倒嘅生活。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！