啟德開幕｜容祖兒打頭陣跳唱 甄子丹江旻憓比劍 劉德華驚喜現身
啟德體育園開幕典禮傍晚6時半在啟德主場館舉行，開幕禮採用「三面台」設計，表演嘉賓包括容祖兒、MC 張天賦、甄子丹、葉蒨文、林子祥、葉麗儀、李幸倪等，氣氛不錯。一開始已見到甄子丹與江旻憓表演劍擊賽，之後就是一連串的歌手表演。
作為嘉賓之一，表演後容祖兒表示：「好榮幸、好興奮，可以喺舞台上面望住呢個Stadium。感覺好新鮮，場地好大，就咁行都真係幾索氣㗎。音效都好好，唱咗《越唱越強》，都有特登重新編曲同排舞。想唔想喺度開show，一定會想，都一定好玩，同埋喺呢啲戶外嘅場館，睇就睇得多，所以期待自己可以喺呢度有一個屬於自己嘅演唱會。」
至於MC就指：「今次嘅表演係最緊張一次 ，腎上腺素飆升最勁嘅一次 。不過即使緊張 都冇影響到我享受個舞台！ 今次嘅舞台非常大，非常闊落，而且亦有設好多唔同嘅機關 ，喺綵排嘅時候其實都已經幻想緊如果自己開演唱會嘅時候場面會係點樣，他朝有日如果可以開個人演唱會，我都希望可以用多啲舞台設計！所以諗完就更加興奮。
《記憶棉》呢首歌大會揀嘅，都算係我拿手嘅一首歌，亦都算係我嘅代表作，好榮幸可以以呢首歌作為我係大場嘅第一次表演歌曲。我會繼續努力，希望終有一日可以係係啟德呢個場開個唱啦！」
Gin Lee：「表演嘅心情係非常之興奮同埋期待，直到升降台升出嚟見到全場坐滿咗咁多觀眾，原來都係會有啲緊張，但係好快就返番去好享受呢個舞台。因為今日只係唱一首歌，所以我都要好好把握每一分每一秒喺呢個台上面嘅感受。
好開心今次可以同大家第一時間去感受呢個場館。我覺得呢個場館好震撼！亦都好大！見到有咁多觀眾喺度，個感覺係：「嘩！」好震撼。
非常希望自己都有機會喺呢度開show，如果喺呢度開show，我已經有好多諗法，呢個場咁大、咁好嘅一個地方，有好多嘅發揮嘅空間，例如可以設計一啲特別效果嘅舞台，希望有機會可以喺呢度開show啦。」
