【喜事近】由余香凝講起 掀出娛圈複雜情網 陳家樂連詩雅阿Sa陸永拉晒落水

今日有傳影壇新貴余香凝(Jennifer)喜事近，下個月就拉埋天窗，仲話係雙喜臨門。而余香凝本來同佢經理人都係向查問嘅記者回覆「私人事唔回應」，更加惹人猜測。轉個頭Jennifer就喺IG出post晒婚照公布喜訊，恭喜晒！

余香凝曾經分別憑《逆流大叔》同《非同凡響》嘅演出，分別獲提名最佳女配角及女主角，但係最多人記得嘅都係佢同陳家樂嘅舊情。然後陳家樂最近又有新緋聞，新歡係情史豐富嘅連詩雅，咦！數下數下，原來可以數出一個「娛圈情網」！

余香凝陳家樂 共患難但未能走到最後

2014年因為拍港台劇《總有出頭天》而撻著，之後大方公開戀情，本身發展穩定，2017年陳家樂揸車載住女友遇上車禍，余香凝鼻骨裂撞，恐有破相之虞，陳家樂好man咁話會照顧對方一世，仲買定戒指！不過2018年，傳媒影到余香凝上保險才俊Victor屋企過夜，見記者時承認同陳家樂已經分手，但係強調冇第三者，Victor亦唔係新男友。至於受情傷嘅陳家樂就眼紅紅回應記者提問，話「祝福對方」。

陳家樂連詩雅 拍旅行特輯撻著

Dry咗一排嘅家樂，今年6月初被爆夜訪連詩雅(Shiga)香閨，之後再被拍到二人拖手行街照，戀情因此曝光，但係當事人只肯認對方係好朋友。有傳佢地係因為去韓國拍TVB旅遊節目《12個夏天》而撻着，Shiga解釋因為大家年紀相近所以好好傾喎。

連詩雅暗交有米音樂人徐浩 三年情今年玩完

喺Shiga被爆同陳家樂交往之前幾個月，女方先至承認同音樂人男友徐浩因為價值觀唔同而分開一段時間，回應話覺得呢個階段回復做好好朋友、好好嘅工作夥伴，關係更舒服。連詩雅同家境唔錯嘅徐浩拍拖3年幾，但係中間分過手又復合過，最後都係無疾而終。

「百億太子爺」石恆聰 同連詩雅分分合合 再同阿Sa來往

Shiga同徐浩拍拖未耐就分過手，之後佢翻撻人稱「百億太子爺」嘅石恆聰。Shiga同石恆聰2014年拍拖，到2016年分手；Shiga無耐就撻著徐浩，但係話咁快就玩完，到2017年頭，有傳石恆聰 同連詩雅復合，可惜又係維持到短時間。隔一排就傳出阿Sa同石恆聰交往，而且感情穩定至今。

連詩雅舊愛曲赤親熱照流出 燒埋陸永老婆

又係連詩雅！16歲嘅Shiga曾經同rapper曲赤拍拖，puppy love分手收場好正常，但係事隔多年，Shiga成為藝人之後，佢同曲赤嘅咀咀照突然流出。另一受害人係「農夫」陸永老婆Reina，事後陸永十分扯火，寸爆曲赤為人。