【《單車》歌詞意思】黃偉文寫「情信」俾陳奕迅 歌頌父愛原來係誤會?

·2 分鐘文章

填詞人黃偉文近來間中喺Instagram刊出歌詞手稿,並且會帶出作品背後的小故事,當做疫情期間鼓勵followers嘅小禮物。

最近Wyman就post咗陳奕迅嘅《單車》歌詞,講出一個佢同Eason嘅小秘密。喺歌詞最後一段,Wyman寫咗一小段文字︰一直莫名其妙地喜歡單車(和電單車),後來才想起,一年班的時候,試過摟著父親的腰騎電單車去海灘,那是我生命中唯一的一次擁抱他,也是唯一的一次比較實在覺得 爸爸是真的愛我的。

唔少人都以為《單車》呢首歌係刻劃父子之間嘅細膩感情,原來大家都get錯咗!Wyman曾經喺專欄寫過,歌詞係對父親嘅投訴。Wyman形容爸爸係典型中式父親,對仔女嘅愛唔會宣之於口,當然唔會攬攬錫錫。而前面故事提到嘅電單車,Wyman爸爸喺入秋前就賣咗,父子之間只有嗰次嘅擁抱,令Wyman對於父親嘅吝嗇耿耿於懷。當時Wyman嘅文章表明《單車》「的確是點給全世界父親收聽的,卻不全是善意的」。

呢個誤會原來唔止歌迷先有,Wyman憶述唱片公司將呢首「怪責」父親嘅歌放喺父親節前後派台,甚至前港隊單車手洪松蔭,都代另一位前港隊代表黃金寶問Wyman,歌詞係咪寫黃同爸爸嘅故事。

至於嗰段描述歌詞背後故事嘅「情書」,亦都有段故。細心嘅Wyman為咗幫歌手演繹時「入戲」,於是有呢個歌詞以外「寫紙仔」嘅做法。Wyman為Eason作曲主唱嘅《那一夜有沒有說》交歌詞時寫出第一封「情書」,事後Eason表示好喜歡呢種溝通,認為對佢嘅演繹好有幫助,於是Wyman之後都會喺歌詞以外寫幾句比Eason,呢個習慣維持咗十幾年,由寥寥幾句到兩三頁紙都有。除咗Eason,其他歌手都偶然會收到Wyman呢種「情書」,但唯獨Eason必定收到,因為呢個係佢指定要求。

呢個習慣直到向來將手寫歌詞fax到錄音室嘅Wyman改用email交歌詞,而且佢認為經常「收信」嘅陳奕迅已經有理解歌詞嘅能力,於是就停止呢個舉動。

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能