$108巨型軟殼蟹冬陰功包!玩味漢堡西餐廳登陸土瓜灣

漢堡有好多可能性,好似土瓜灣呢間餐廳就有多款Fusion配搭口味,糅合唔同國家食材,連純素版本都可以做到好好食。而且從麵包、牛肉漢堡扒、醃漬物等都係自家製,層層唔同味道口感中食得出心機。漢堡之外亦有牛扒、海鮮、意粉等,一個人嚟獨食或者一班人聚餐都好啱。

自家製心機漢堡 希望客人食得開心

Cutting Onions」位於土瓜灣港鐵站附近,落地玻璃窗加上半開放式吧枱增加空間感,坐得舒服。負責人指店名源自好多人怕切洋蔥會流眼淚,咁餐廳就代大家做呢樣嘢,希望唔使再喊,可以食得開心啲。由手繪Logo到菜式名都會令人會心一笑,主打嘅漢堡更絕對能夠滿足大家口福。

空氣感Brioche + 手打Rump Cap漢堡扒

招牌!!!手打牛肉漢堡($148)
招牌!!!手打牛肉漢堡($148)

麵包係自家製Brioche,唔單止鬆軟、有空氣感同牛油香,更比一般Brioche深色同帶麥味,原來係廚師製作麵包嘅時候會混入全麥粉。而手打牛肉漢堡扒就選用Rump Cap(牛臀肉蓋)部位,貪其肉味濃郁、脂肪比例得宜,打成漢堡扒煎焗至外焦脆內半熟,咬落更充滿肉汁!

配菜都係加分點,半融嘅高達芝士增添奶香,鳀魚蛋黃醬就帶鹹鮮香氣,蕃茄同牛油生菜平衡油膩感。最搶鏡嘅就要數到上面嘅炸洋蔥圈,係廚師先醃漬過再炸,外脆內爽,微酸而唔嗆好開胃。平日午市(12:00-18:00,公眾假期除外)可以+$20加薯條同飲品啊。

巨型炸軟殼蟹 + 酸辣泰式沙葛沙律

泰式冬陰功酸辣沙葛炸軟殼蟹包($108)
泰式冬陰功酸辣沙葛炸軟殼蟹包($108)

送上枱真係會Wow一聲,皆因炸軟殼蟹相當大件!食落同樣有驚喜,炸軟殼蟹非常酥脆又有鮮味,配搭香甜多汁嘅芒果、微辣嘅冬陰功蛋黃醬、酸辣爽口嘅泰式沙律,惹味得嚟又意外清爽。皆因泰式沙律加入生沙葛同糖花生,兩款唔同嘅甜味同脆度都大大增加層次。另外重有兩款純素漢堡:辣辣地泡菜豆腐包($88)同洋蔥芝士菇菇天貝包($98)推介返。

麻油香滿分!升呢版阿麻雞翼

阿媽雞翼2.0之阿麻雞翼($56)
阿媽雞翼2.0之阿麻雞翼($56)

未上枱先聞到好勁麻油香,佢哋嘅阿媽雞翼2.0可以話係升級版,單骨雞翼炸得香脆乾爽唔油膩,加上醬汁、蔥絲同芝麻,甜甜哋令人忍唔住一件接一件,話咁快就會清晒成碟。

自家研發純素芝士配薯條

濃洋蔥汁芝士薯條($56)
濃洋蔥汁芝士薯條($56)

唔單止漢堡、意粉有純素選擇,小食一樣有,呢份濃洋蔥汁芝士薯條裡面嘅芝士係廚師用堅果、木薯粉等自家製作,模擬返Cheese Curds(芝士凝塊)煙韌清爽嘅口感。而濃洋蔥汁就用洋蔥、蕃茄、香料等熬煮而成,鹹甜得宜,同外脆內軟嘅薯條非常夾。

清甜版茶記凍OT

百里香檸檬茶($45)
百里香檸檬茶($45)

望落好似一般凍檸茶,但其實茶底用咗本地茶室想爺爺了嘅正山小種同單叢兩款茶,前者取其荔枝同蜜糖香,後者取其馥郁紅茶茶味,所以飲落有港式茶餐廳凍檸茶嘅酸同香,但完全無澀味!加上百里香整體更清新。餐廳亦有香港嘅手工啤酒($60)、本地有氣發酵茶($55)、兒童鴛鴦($45)等特飲任揀啊。

裝修走工業風,一排落地大玻璃窗增加採光
裝修走工業風,一排落地大玻璃窗增加採光

Cutting Onions

地址:紅磡馬頭圍道63號啟岸1樓02號舖

文:Cathy.H

相:Sunny