《地產仔》演員配搭新鮮 廖子妤/陳穎欣/吳肇軒/胡子彤/徐浩昌成焦點

ViuTV新劇《地產仔》喺上星期一開始播出，劇情主要講述兩大地產龍頭「龍星置業」及「和聯興地產」嘅鬥爭、一班地產經紀嘅辛酸心路歷程，及道出香港人對「上車」嘅渴望。除咗題材貼地之外，劇集仲雲集實力與新生代演員。唔少觀眾睇咗之後都有不俗嘅評價，話劇情搞笑貼地、主角年輕有活力及演員配搭充滿新鮮感等等。既然年輕演員係今次劇集嘅焦點，咁而家就同大家睇下呢班年輕新生代演員啦！

廖子妤 飾演魚哥

廖子妤（Fish）嚟自馬來西亞，喺2012年選擇隻身嚟香港追夢，因為廖子妤嘅Cool爆外形加上文青憂鬱氣質，所以被稱為「黑面女神」。廖子妤喺《末日派對》初次登上大銀幕，之後佢專注演員事業，參與多套電影及電視劇拍攝，例如電影《同班同學》、《骨妹》、電視劇《火速救兵3》、《向西聞記》及《理想國》等等。今次廖子妤喺《地產仔》中飾演和聯興地產嘅分店經理魚哥，係令狐飛、劉文輝、 陸進及徐明威嘅上司兼好朋友。今次係廖子妤第一次以男性化造型示人，氣勢十足，劇中講佢係萬人迷，地產公司門口經常有唔少女粉絲舉牌及煲湯等佢。其實廖子妤唔止戲內受歡迎，戲外都有唔少網民讚佢型過唔少男仔。

吳肇軒 飾演狐飛

吳肇軒畢業於香港演藝學院戲劇學院，2015年憑《哪一天我們會飛》入行及被觀眾認識。之後，吳肇軒參演過電影《十年》、《一念無明》、《以青春的名義》及《破處》等等，劇集方面就拍過《身後事務所》及《理想國》等等。今次吳肇軒喺《地產仔》中飾演胸無大志嘅令狐飛，由裝修仔轉行做地產仔，亦與陳穎欣（Yanny）有感情戲。

陳穎欣 飾演欣豬

陳穎欣（Yanny）係女子組合Super Girls成員，入行後主要專注音樂發展，間唔中參與劇集、電影及舞台劇演出。陳穎欣繼上年喺劇集《仇老爺爺》擔任女主角後，今次喺《地產仔》都有唔少戲份，陳穎欣喺劇中飾演地產經紀欣猪，經常被上司鄧少（張文傑飾）毛手毛腳，之後會同狐飛係情侶關係。睇過陳穎欣演出嘅網民都讚佢可愛、gfable及演技不造作。

胡子彤 飾演盲雞

胡子彤係前香港棒球代表隊成員，憑電影《點五步》入行，胡子彤更憑此電影勇奪香港電影金像獎「最佳新演員」獎項。不過胡子彤最為人熟悉嘅係佢同香港游泳代表歐鎧淳嘅3年戀情，感情穩定嘅佢哋上年年尾爆出分手，指女方暗撻本地女籃球員倪碧賢。今次胡子彤喺劇中飾演地產仔盲雞，患有讀寫障礙，出身富裕嘅佢一事無成，不過諗頭多多，因官司纏身被媽媽趕出家門，之後就去咗狐飛屋企暫住。

邱士縉 飾演阿鹿

MIRROR成員Stanley（邱士縉），透過ViuTV選秀節目《全民造星》入行，雖然Stanley唔係隊中最紅嗰個，但佢都有唔少演出機會，例如綜藝節目《入住請敲門4》、劇集《做演藝嘅》、《娛樂風雲》及《黑巿》等等。邱士縉喺《地產仔》中飾演前港隊運動員阿鹿，自小父親就教佢做人要公平公正，經歷比賽失敗及被拜金女朋友嫌棄後，佢就變成一個貪圖名利嘅人。成為地產公司職員後，仲不擇手段Sell客。

徐浩昌 飾演肥龜

徐浩昌（肥腸）係臨時演員出身，過往參演過唔少節目、電影及劇集，例如節目《脫獨工程》、《Show肌》、電影《12金鴨》、《棟篤特工》、《Baby復仇記》、劇集《退休女皇》及《黑市》等等。徐浩昌今次喺《地產仔》雖然係飾演配角，不過就非常搶眼，佢係飾演一個會計好叻嘅「觀音兵」，佢女友（岑樂怡飾）係一個極級港女，肥龜因女友無樓不嫁而努力搵錢，發憤向上，以買樓為人生目標。