雅虎香港新聞 「地道」星期五影院︰郭富城開竅之作《三岔口》
唔覺唔覺，《無雙》票房已經收過3000萬，成為今年暫列年度票房亞軍嘅華語片。
好耐無見發哥交足貨嘅演譯，咁由頭帶到尾嘅郭富城呢？小人覺得，下年金像獎，應該會係佢地兩位，同埋《翠絲》姜皓文加埋《逆流大叔》吳鎮宇之爭。
睇《無雙》城城由頭帶到尾嘅演出，自不然想拎返呢套被譽為「郭富城演技脫胎換骨」之作《三岔口》。
《三》嘅陣容幾強橫，編劇係金像獎得主岸西，仲要係佢少數涉獵嘅警匪犯罪片種；導演陳木勝都係金像提名常客，亦都擅長拍警匪片，名作包括《衝鋒隊之怒火街頭》。卡士方面，一次過搵鄭伊健、吳彥祖同城城三位一線小生再加視帝羅嘉良（仲有E-Kids Tommy阮民安…），女主角仲要係李心潔，睇見宣傳品都覺得要寄予厚望。
故事係講女友失蹤多年嘅警察孫兆仁（郭富城），喺調查富商饒天頌（羅嘉良）兒子失蹤案時，發現饒之律師（鄭伊健）的妻子（李心潔）與其失蹤女友相貌極似。而孫之前押解證人的行動中遇到伏擊，有份襲擊警方的殺手（吳彥祖）又與孫的女友失蹤有莫大關係。
「三岔口」呢個名出自京劇劇目，故事高潮是三位主角午夜時份在客棧你追我逐的武打戲，最考演員工夫是他們要在有燈光的舞台上，演繹在伸手不見五指的環境下如何出招。聽完典故，到底電影與這套經典有何關係？其實由劇情睇都幾難聯想到。而《三》幾條線的處理都未夠清晰，所以……我都係講返郭富城啦～～
當日好多人睇完都話郭富城演技大躍進，我覺得相對之前嘅作品，《三》係令人見到城城求變之心。起碼，要佢做個潦倒警察，佢都真係肯唔剃鬚、著啲唔太啱身嘅西裝跑幾條街仲跳埋天橋。對上一年都係警匪片嘅《重案黐孖gun》，城城都真係Men in Black咁查案架。
一個演員演技有幾好，睇身體語言就知。《三》入面，城城嘅面部表情又真係出神入化，尤其是佢個口同鼻哥窿︰
想喊，先眼紅紅，再擴大個鼻窿。
被膠袋笠頭，扯開個袋之後第一下就係擘大口抖啖大氣。
當然唔少得最經典一幕 — 揸緊車，喺斜路上面諗起失蹤女友，架車溜後佢仲喊到崩潰，真係喊到口張開架……
嗱嗱嗱，正常人遇到呢啲情況都會係咁，所以城城真係拋開天王形象，不顧身世瞓身出力演出架！
而城城亦都不負眾望，以呢套戲拿下佢第一個金馬影帝獎座。
更威嘅係，之後嗰年再憑佢精湛演技，以《父子》成為冧莊金馬影帝。
2015年，《踏血尋梅》令城城成為香港電影金像獎最佳男主角，角色咁啱又係潦倒警察。
《無雙》入面佢都有段時間懷才不遇，會唔會又係攞獎先兆？
所以我覺得，《三岔口》真係令郭富城同觀眾都相信郭富城做戲係得嘅（我冇打多咗字！）。
天橋嗰場，真係好值得一睇再睇呀～～～
