外國研究：33.5%比特幣投資者 不了解比特幣

近月多位知名投資者如及「未日博士」不停唱衰加密貨幣，並直指呢味嘢無價值及投資者唔知自己買緊乜，而近日終於有研究至少證實原來唔少炒幣友真係唔知自己買緊乜。

Cardify在二月訪問了750名加密貨幣投資者，訪問期間比特幣正值由37000美元爆升至47000美元，講白啲就係炒風厲害。調查發現只有16.9%受訪投資者自認了解買入加密貨幣的價值及潛力，33.5%受訪投資者就坦言承認對買入嘅「幣」零了解。

呢個結果似乎幾荒謬，但睇埋調查另一關鍵發現就解得通。原來有四分一受訪者承認，是為了短線投資賺快錢去炒幣。在感情世界，追求即食感情的花心男女，著眼點都係追唔追到對方同幾時將關係告終，邊會花時間了解對方興趣、背景、性格之類「基本因素」。同樣道理，炒幣新手見到個市咁癲，趕快落水賺快錢係首要任務，知識型投資就顯得有點不合時宜。

大家都係「有智慧不如趁勢」

話分兩頭，研究雖然有取笑「盲毛投資」之嫌，但有幣友的確轉身搵到錢，而且日後SPAC玩法登陸香港，抽SPAC股就更進一步只有「行動綱領」，這情況下，熱衷抽新股玩家又無乜條件笑炒幣友了，因為大家都係「有智慧不如趁勢」。

Cardify調查尚有一項富教育意義的發現，就係逾半受訪者都憂慮幣市大上大落會增加輸錢風險，換句話說就係對幣市無信心。落水投入一個風高浪急市場，提醒自己要無信心反而係保本要訣，玩幣也好玩抽新股也好，記住要對市場無信心，咁先可以逼自己保留翻身本錢，減少輸清光風險。

【下載Yahoo財經APP】獲全球超過1700萬人信任的美股投資工具，跨平台同步你的投資組合，一APP掌握TSLA、AAPL、AMZN等美股最新走勢。