【外語903】而家睇夠應景《地球末日戰》一早話源頭係……

近月全球受新型肺炎影響，各個國家都實行不同程度嘅鎖國措施，唔少民眾要在家工作，或被逼停工滯留家中。睇返串流平台收視榜，不難發現大家都選擇同疫情相關嘅節目觀看，好似以SARS為藍本嘅《世紀戰疫》於多國位列榜首，而今日同大家重溫嘅《地球末日戰》，情節同今日都有幾分類同！

2013年上映由型佬畢彼特主演，改編自Max Brooks同名小說《World War Z: an Oral History of the Zombie War》嘅《地球末日戰》全球票房大收美金5億4000萬，成為史上最收得嘅喪屍電影，跟手仲出埋電腦遊戲，打喪屍嘅緊張情節確實幾適合打機。

電影講述不知名恐怖病毒火速於全球擴散，各國陷入極度恐慌。該種可怕病毒，不但能瞬間致命，屍體更會立即轉化為喪屍，侵襲其他人類！前任聯合國調查員謝利(畢彼特 飾)與妻子及兩名幼女一度身陷險境，他脫險後加入緊急救亡行列。他走遍世界，尋找消滅病毒的方法。對於全世界的人類而言，要繼續生存下去唯有不惜一切打勝這場硬仗！

電影雖然改編自小說，不過上咗大銀幕，觀感刺激行先，人物描寫自然變得薄弱。好似畢彼特明明無再做聯合國調查員，但仍然獲厚待得到軍方救援全家脫險，又莫名其妙地好似忽然無哂現職調查員，於是要求佢擺低屋企人出去搵解決辦法。最奇係無論佢去到邊個國家，對方都會出動及犧牲自家人保護佢，呢啲位好超現實！

不過，《地》都有唔少貼地描述，好似疫情面前人會顯露真面目，搶嘢姦淫擄掠，連警察都顧咗自己先，懶理他人死活！又或者，明明對疫情早有預備，建好高牆防疫，偏偏牆內嘅人唔生性，聚埋一齊開大音響載歌載舞開party，引來大批喪屍爬牆大開殺戒，結果攬炒！

畢彼特終於上咗飛機走佬，點知架機有喪屍，成機變成高度傳染場所，結果墜機，畢彼特當然無事只係受輕傷，仲可以去到間lab，用實驗室嘅病菌引証喪屍只針對健康嘅人，身體差嘅老弱反而免疫，就係咁疫苗研發成功，救返個世界！

《地》同新型肺炎有幾分似，兩者都係傳播力極強，封閉人多嘅地方最有殺傷力，保持一定社交距離有助抗疫，不過人類仲係唔聽話，繼續聚埋一齊又或者繼續外遊，將病毒散播！電影初版仲有神預言，有講過「中國很黑暗」(China is dark）及「零號病人」出自中國！不過小說喺內地係禁書，亦唔可能容忍電影內中國係病毒起源國嘅情節，所以最後上映版本有刪改，俄羅斯成為源頭，可惜改咗都攞唔到批文，內地無公映過！