大叔的愛｜前亞視小生羅頌華／「交叉小姐」何美好／ViuTV女神沈殷怡做阿牧家人好驚喜

由MIRROR成員Edan（呂爵安）、Anson Lo（盧瀚霆）及黃德斌主演嘅ViuTV劇集《大叔的愛》，劇情輕鬆搞笑及製作高質，自播出以嚟好評不斷，唔少觀眾日日準時坐定定睇電視。劇中阿牧（Anson Lo飾）及阿田（Edan飾）嘅感情線真係日日新鮮，冇悶場。佢哋感情戲好睇之餘，大家亦留意到有其他演員嘅參演。星期二（13日）播出嘅第12集就講到阿牧決定帶阿田見家長，令阿牧家人終於曝光，飾演阿牧爸爸嘅係昔日亞視小生羅頌華，媽媽就係何美好，而家姐就由沈殷怡（Shirley）飾演。

羅頌華八十年代加入亞洲電視並開始參演電視劇，因為劇集《藍月亮》而曾經成為當年亞視力捧的「十二星道」之一。1990及1991年劇集《中華英雄》及《中華英雄之中華傲訣》中飾演華劍雄而為人認識。除咗拍電視劇之外，羅頌華亦有擔任主持工作，最多人記得嘅應該係綜藝節目《今日睇真D》。今次佢係《大叔的愛》中飾演阿牧爸爸，係一位大澳人，一個大男人反對自己仔仔係一位同性戀者，更希望佢應該可以生兒育女繼後香燈。佢亦因為一時接受唔到，所以對阿田態度非常差劣。劇中阿田被阿牧媽媽及家姐玩弄要幫阿牧爸爸刷背，佢當刻嘅反應真係好頂癮。

飾演阿牧媽媽嘅何美好，大家當刻可能未必嗌得出名，但就覺得非常面熟。其實何美好平日大多數係劇集綠葉演員，現時於無綫電視亦係特約演員，冇合約束縛嘅佢，可以自由身接唔同工作。大家應該對佢參演過嘅劇集及節目唔太有記憶，不過提起1995年無綫綜藝節目《人生交叉點》嘅「交叉小姐」就可能令人有些少印象。

阿牧一家四口仲有個家姐，今次飾演家姐就有「ViuTV性感女神」之稱嘅沈殷怡（Shirley）。沈殷怡除咗樣靚身材正之外，佢讀書仲好叻添，DSE考獲4科5**，全額獎學金升讀上海復旦大學法律系，擁有內地律師牌。之後回流香港，喺中大修讀法律系碩士，畢業後先去咗律師事務所實習一年。Shirley於2018年加入viuTV，拍攝劇集《詭探前傳》後人氣急升，之後拍攝多部劇集及節目，例如《娛樂風雲》、《辣伙頭》、《金剛旅神團》、《美女郊遊遊》及《造美人》等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！