日劇《大叔的愛》拍電影版嘅消息一出我地都即時同大家分享過，而電影落實將於8月23日在日本上映。映期將至，宣傳攻勢亦相繼開始，電影海報同預告片貫徹電視劇作風，大大個心型爆炸雲喺正海報中心，唔通預示電影版幾角關係會再升級？

電影版《大叔的愛～LOVE or DEAD～》 延續劇集故事發展，被派往上海工作嘅春田田（田中圭飾）將會調回日本，終於唔駛同阿牧（林遣都飾）遠距離談情，仲暗示2人關係會更進一步（已經結婚？！）。不過，話到明叫《大叔的愛》又點可以無黑澤部長（吉田鋼太郎飾）？今集部長繼續見到春田田就變花痴，仲似乎會同新加入嘅澤村一樹擦出火花，是敵是友真係要睇戲先知！

飾演春田田上司嘅澤村樹一村喺日本有個朵叫「色情部長」，要得到呢個稱號都要有啲功架！話說高大靚仔嘅佢以模特兒身份出道，後加入電視圈開始拍劇，因為靚仔反而限制咗角色。佢為咗可以演多啲類型，決定挑戰NHK喜劇《NEO上班族》，結果大受歡迎，「色情部長」之名由此而生。加上，佢上綜藝節目大講咸故之餘又唔cheap，大家好得佢獨有嘅「色氣」，唔知《大叔的愛》邊個會中招？

另一個新加入嘅角色，就係由志尊淳飾演嘅熱血新同事，年輕熱情嘅佢會倒追前輩定被人追，又或只係成為大家嘅好朋友？志尊淳除咗係當紅小鮮肉，有偶像派嘅外變亦有實力派演技，2018年憑迷你劇《女子的生活》彈出，劇中飾演跨性別者小川美紀，生為男生但由外到內都充滿女人味嘅白領，面對生活、家庭、感情及自我認同等點滴。志尊淳女裝打扮讓人怦然心動，其中細膩嘅情感演譯非常出色。

除咗新加入嘅澤村一樹同志尊淳，劇集原班人馬會繼續出演，早前官方ig透露咗電影分別喺上海及香港拍攝，網上仲流傳春田田喺灣仔街市拍攝片段。香港仲未知幾時上映，但我相信套戲咁有話題，應該會有片商引入啩。我好想睇部長太太（大塚寧寧飾）助攻，幫前夫追仔囉！