大學球星著爆波鞋 點解會令Nike唔見87億？

一場波可以影響股價咁犀利？   是咁的，美國全國大學籃球賽(NCAA Basketball Men），喺當地時間星期三晚上演矚目大戰，由「波神」米高佐敦母校北卡羅來納洲大學（UNC)，作客迎戰另一籃球名校杜克大學(Duke University）。   因為杜克大學坐擁超級新人Zion Williamson，令呢場波嘅波飛炒價，最平都要2500蚊美金（約港幣＄19450），拍得住上個月全國盛事Super Bowl，連前總統奧巴馬都喺現場觀戰。   Zion Williamson有幾勁？6呎7吋285磅，聽落好似好笨重，但係佢嘅體能同爆炸力冇受體重影響，今個球季已經多次出現佢將對手一嘢撞開、單手揸凹籃球呢啲「力的表現」，唔少球探都估計Zion好大機會係下一個NBA新秀壯元，仲話係繼LeBron James之後，另一個「怪物級」體能球員。   不過，場波打咗35秒，Zion運球期間，一嘢掙爆對波鞋，仲因此扭傷膝頭，要離場休養。

買貴飛睇波嘅失望，另一個輸家估唔到係……Nike。比賽翌日，佢地嘅股價最多跌咗1.8％，市值大概唔見11.2億美元，即係約87億港紙！原因其實唔難理解︰   1．「剔牌」嘅收入當中，有14％來自籃球用品，大約係43億美元。爆鞋事件令消費者質疑產品質素。   2．假如Zion一方認為係波鞋質素同設計令佢受傷，呢場官司絕對有得打。   3．今次事件令Nike爭取Zion成為代言人嘅贏面受影響。需知由佐敦開始，以至Kobe Bryant、LeBron James等等以球星命名嘅波鞋糸列，都係銷售保證。假如Zion爆紅而Nike簽佢唔到，條數就襟計囉。難怪另一品牌Puma都出post抽水恥笑！

呢單嘢可以點拆？不過Nike嘅市場觸覺咁強，之前就夠膽搵喺播國歌時下號、抗議黑人屢受警員暴力對待嘅美式足球員Colin Kaepernick做代言，仲因此帶動銷售上升。爆鞋？碎料啦。原post傳送門