《大帥哥》飾演「滿仔」入型入格 黃耀煌獲網民關注

今年無綫壓軸劇《大帥哥》深受觀眾歡迎，除咗張衛健回巢萬眾矚目之外，近期最多人留意應該係佘南（古明華飾）同滿仔（黃耀煌飾）呢一對男男CP。

黃耀煌於2010年份加入第24期無綫電視藝員訓練班而入行，入行後被安排到娛樂新聞台擔任主播，12年被監製戚其義睇中參演《金枝慾孽貳》初嚐演員滋味。之後黃耀煌都參與過唔少劇集，不過都係演閒角多，直至《大帥哥》飾演「滿仔」一角成功獲得網民關注。劇中與軍閥佘南經常出相入對，好似劇集初期佘大帥喺出席晚會時將佢介紹俾蒙大帥識、狄奇接管昇威鎮，蒙大帥要求三位在場旅長送另一半俾佢做姨太太，佘大帥迫於無奈將滿仔送俾狄奇，好彩狄奇嫌重口味唔要，滿仔先可以好開心咁返去佘大帥身邊。

上星期其中兩集黃耀煌仲同徐榮上演「爭寵」戲碼，羅義（徐榮飾）為咗救婍婍（簡淑兒飾）及知道毒氣彈收藏地點，佢不惜去佘大帥嘅陣營「和番」，不過佘大帥要新唔要舊，冷落咗滿仔，搞到滿仔醋意大發。唔少網民大讚佢飾演「男寵」入型入格，更令佢被懷疑真實嘅性取向，不過其實佢已經有一個拍咗3年幾拖嘅女朋友㗎啦！

《大帥哥》除咗有黃耀煌之外，其實2016年更憑《公公出宮》扮演娘娘腔嘅太監獲得萬千星輝頒獎典禮最佳男配角嘅曹永廉(阿廉)，今次劇集中仍然扮演一位娘娘腔嘅太監，劇中扮演聲線及神情恰到好處，演技同樣被受肯定。