《大海男兒》離島接受考驗 新丁主持表現劣評如潮

ViuTV全新旅遊節目《大海男兒》喺星期一（19日）首播，節目搵咗三位《全民造星2》仔仔擔任主持，分別Phoebus吳啟洋、George歐鎮灝及Marco葉振弘。今次《大海男兒》同之前《美女郊遊遊》好相似，之前係女仔版行山，今次就係男仔版玩水，三位大男孩會去唔同嘅離島接受考驗。節目已經出街咗幾日，唔少觀眾對節目同主持嘅評價都麻麻，而且仲一致認為主持們未夠經驗，而且講嘢仲好多懶音。

Phoebus吳啟洋
現年24歲嘅Phoebus（吳啟洋），係香港手球隊成員。Phoebus除咗靚仔之外，仲擁有身高一米八，喺2014年參加Ustar嘅時被稱爲「翻版金秀賢」，之後仲成為模特兒。因外形討好喺參選《造星II》時已經被視為大熱，最終不負眾望成為冠軍，今年8月正式簽約ViuTV成為旗下藝人。

George歐鎮灝
21歲嘅George（歐鎮灝）入行前曾任兼職銷售員，喺今年同樣正式簽約ViuTV成為旗下藝人，本身樣貌出眾嘅佢喺參加《造星II》時已經吸引到一班女粉絲，平時亦一直苦練唱功舞藝。因為佢嘅進步，更曾經被花姐欽點佢拍廣告。

Marco葉振弘
現年只有19歲嘅Marco葉振弘，參加《造星II》時係最年輕嘅參加者，入行前仍然係一個學生。參加《造星II》後，最終入圍最後三十強，今年亦順利簽約加入ViuTV成為旗下藝人。