大灣仔張智霖陳小春想坐快艇返香港被拒 網民笑︰有冇常識？

陳小春、張智霖、謝天華、林曉峰、梁漢文5位香港藝人北上拍攝內地綜藝節目《大灣仔的夜》，主線係佢地開港式茶記嘅軼事，中途加插唔同遊玩環節。

早前播出嘅一集，佢地5個一齊喺廣州坐船出海，諗起香港維港夜景，話想返去行一轉。

船隻之後去到接近香港邊境嘅海域，眾人以為真係有機會「回家」，點知拍攝組告知只有帆船先可以入境香港水域，但係船程要4個鐘，唯有折返。5個大灣仔睇落十分失望。

呢個設定唔知係製作組安排定臨時狀況，但中港兩地網友都齊齊唔收貨。有人認為製作組常識欠奉，船隻入境要事先申請證件，斷唔可能即興話返就返，除非偷渡。更何況而家出現新冠疫情，出入境都有唔少防疫限制，甚至要隔離，想返香港點解唔申請「回港易」？由於安排太「膠」，兩地觀眾都俾負評。

不過《大》的確重本請藝人，最新一集有譚詠麟做嘉賓，之前請過鄧萃雯、黎耀祥，連2位成員陳小春同張智霖嘅太座袁詠議及應采兒現身，加埋特別搵堂景返嚟做餐廳，十分揼本。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！