大茶飯│天堂與地獄的一天(青冰)

·3 分鐘文章
天堂與地獄的一天
今次不作分析,只對照年初及年尾,一個港股投資者怎樣過一天。

在2021年,港股經歷了天堂及地獄,在年初市況火旺,恒指高見31183點,但自2月起就一直反覆下挫,當中的原因大家都聽過很多,今次不作分析,只對照年初及年尾,一個港股投資者怎樣過一天。

下載Yahoo財經APP

美股、外匯、加密貨幣免費即時報價,自選投資組合獲取相關新聞提示。

年初新股最當旺,散戶每朝都會睇實有甚麼新股,由於同期上市的新股太多,不少重點新股的招股期亦會重疊,散戶既要分配資金,亦要確保有孖展額去抽,還記得某劵商利率劃一地特高,完全唔憂做,每次放額時都像搶iPhone一樣,手腳慢啲都會無額。

年初炒港股 年尾砌美股

開市前亦要睇晒主流財經專欄有乜推介,準備開市即刻衝入場,當時大家個倉有十幾隻股係等閒事,開市時段係極為忙碌,戰友之間不斷互飛冧巴,唔買總係覺得多數會升,即使心足食糊係美事,但沽完升得更快更狂,始終不是味兒。中午休市會刨吓財經新聞,睇吓通告,朋友約午飯都盡量推卻,心諗你咪阻住晒搵食啦,要食就約夜晚。

每日四點收市感覺像虛脫,但股市係未完的,4點15分新股的暗盤又開波了,抽中快手(1024)又或者B仔,心裡忐忑唔知沽唔沽好,沽咗可以留錢抽下一隻,但更怕佢正式上市後升更多。老暗收市後是計數的時間,計吓今日贏咗幾多,嘩痴線,原來又贏咗咁多。收市後的通告要睇實,因為稍有利好消息,翌日爆升可期,夜晚都係要早啲瞓,第二朝睇吓美股新聞已經足夠了。

往事只能回味,現時港股投資者會點呢?

朝早起身第一件事先望吓個美股倉,睇吓買賣盤有冇成交,再睇吓盤後有沒有異動,想食糊及買貨,美股盤後時段去到九點,搭緊車時再慢慢諗吧。

港股時段可以過得輕鬆啲,刨通告變成可有可無,靚通告佔少數,有靚通告而最後股價識大升就更少,財經新聞充斥監管新規及內房撲水,睇得多都悶,偶爾仍會有新股上市,但當超購百倍都會老暗穿底兩成,新股市場已完全冰封。未到午市已經諗定去邊度吃午飯,因為大家都深明,食咗佢總好過輸畀佢(港股)。通常食完午飯就會特別眼瞓,無計呀,因為晚晚都夜瞓炒美股嘛。

先天下之憂而憂,是港股的寫照,A股或美股,邊個跌就跟邊個,即使隔晚美股大升,對港股的刺激都甚短暫,隨時未到中午已經倒跌。消極的投資者會死心唔睇,積極的投資者就會為美股作準備,因為下午五點又是盤前時段的開始,又是充滿機遇的漫漫長夜。

2021年的港股,短暫的天堂生活,伴隨無間地獄,何時會再作交替呢?

青冰

http://www.fb.com/chingbing888

本欄逢周五刊出

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能