大角咀新開日系Cafe 自家飯糰輕食/AeroPress季節茶/精品咖啡

OpenRice開飯喇

九龍區新Cafe越開越多,包括大角咀呢間綠白色門面嘅日系Cafe,大玻璃窗加上簡約裝修感覺舒適之外,食物同飲品都非常用心。飯糰選用日本越光米配搭唔同食材,House Blend咖啡會按季節更換,季節茶用AeroPress手沖,每泡都有唔同風味!

定食套餐($78)
定食套餐($78)

浮生位於旺角同大角咀中間,頗有旺中帶靜嘅感覺。食物以日式輕食為主,定食套餐包括自選飯糰、鹽飯糰、主食同兩款自選配菜。店主試過唔同產地唔同品種嘅米,最後揀咗用日本新潟越光米,味道香甜、飯粒黏糯而有彈性。鹽飯糰就以日本海鹽帶出米香原味,另一款開飯仔就揀咗七味吞拿,吞拿魚餡加入希臘乳酪,味道清爽,表面嘅七味粉係點綴,亦增加味道層次。

麻糬魚腐
麻糬魚腐

主食有關東煮、豚肉角煮同照燒雞肉選擇,關東煮嘅湯底亦係自家熬製,放入配料浸過夜確保入味,麻糬魚腐外韌內軟,獅子狗口感彈牙,蘿蔔入味無渣。配菜推介柚子蓮藕,柚子清香突出,蓮藕片非常爽脆。

五目雞肉飯糰($22/單點)
五目雞肉飯糰($22/單點)
定食套餐($78)
定食套餐($78)

飯糰以可以單點,五目雞肉嘅五目係指五款食材:紅蘿蔔、牛蒡、冬菇、木耳、雞肉,配搭健康同時味道豐富。另一推介係梅·十六飯糰,係夏季限定口味,選用十六穀米,特別有咬口。

和風豆乳雜菌烏冬($68)
和風豆乳雜菌烏冬($68)


和風豆乳雜菌烏冬($68)
和風豆乳雜菌烏冬($68)

餐廳亦有供應麵食,呢款係全素選擇,醬汁以豆乳為主,以豉油、味醂調味,甜中帶鹹。讚岐烏冬彈牙之餘亦夠掛汁,加上雜菌嘅香氣,女仔一個人食一份都唔會太膩。

留白($40)
留白($40)

即係Dirty,上面係熱濃縮咖啡下面係凍牛奶,可以同時飲到熱同凍兩種層次。House Blend咖啡會按季節替換,夏季嘅House Blend係請台灣咖啡師炒豆,糅合六種唔同咖啡豆,入口先有類似熱帶水果嘅微酸,加埋牛奶飲到少少甜味,Aftertaste係可可嘅香味。

精選季節茶:桂花龍井($56/手沖)
精選季節茶:桂花龍井($56/手沖)

用AeroPress沖咖啡已經唔算常見,沖茶就更有新鮮感!原來因為方便控制水溫同浸泡時間,所以揀用AeroPress沖泡,沖過嘅茶餅之後亦可以回沖,而且每泡都有唔同嘅風味。例如呢壺桂花龍井,第一泡桂花香明顯,回沖後第二泡花香同茶香會更平衡,第三泡就更有茶感,亦更帶回甘。

黑芝麻芝士蛋糕($45)
黑芝麻芝士蛋糕($45)

甜品暫時有三款芝士蛋糕,黑芝麻口味嘅黑白雙色夠搶鏡,選用京都產黑芝麻,蛋糕帶淡淡芝麻香,點埋黑色嘅芝醬香氣更為濃郁。口感Creamy,甜度適中。

柚子芝士蛋糕($45)
柚子芝士蛋糕($45)

採用日本高知縣柚子製作,蛋糕面以碎柚子皮點綴,味道微酸帶柚子清新香氣。而旁邊嘅柚子醬偏甜,可以按自己喜好配搭蛋糕一齊享用。

焙茶芝士蛋糕($45)
焙茶芝士蛋糕($45)

最受歡迎嘅焙茶芝士蛋糕,食得出焙茶香味不過唔算非常濃郁,反而仲食到芝士蛋糕本身嘅少少酸味。口感比另外兩款口味結實。

浮生
浮生


浮生
浮生

浮生
地址:大角咀晏架街8號地舖




文:Cathy
相、片:Calvin Kwok


你可能還想看