大讚老婆偉大張頴康：我好幸運，同好幸福！

sundaykiss

更新日期： 2017年8月22日上午6:24

張頴康同老婆麥雅緻（Angie）一向係圈中嘅模範夫妻，人前人後恩愛非常，即使婚後由二人世界變咗三人世界，出名係顧家好男人嘅張頴康絕對冇偏心囡囡小豆（張雅喬），同老婆仲係十分甜蜜！最近佢就喺社交網站歌頌老婆偉大，幸福羨煞旁人！

撰文：Sunday Kiss
圖片：張頴康麥雅緻專頁，張頴康Instagram

張頴康大讚老婆偉大

張頴康喺社交網站發文話：「我想講，我老婆係好辛苦、好偉大！而我係，好幸運，同好幸福！」，圖中見麥雅緻正專心整理家中各種單據，完全冇發現到老公偷拍佢啊！

麥雅緻見到相片後十分驚喜，隨後留言話完全唔知老公幾時偷拍咗佢，睇嚟真係好專注！Angie大住肚都咁落力打理家頭細務，絕對係抵讚嘅！網民除咗羨慕佢哋Sweet爆之外，仲擔心Angie坐喺地下會對BB唔好啊！

張頴康同麥雅緻喺Facebook有一個屬於兩公婆嘅專頁，佢哋亦經常更新近況，大晒家庭幸福！

佢哋仲不時喺屋企開Live同粉絲傾計！十分親民！

張頴康話老婆返到屋企見到呢個溫馨畫面竟然有少少呷醋，好可愛！

當然佢哋亦經常喺Facebook 分享生活照，網民大讚囡囡小豆好可愛啊！

張頴康同小豆有晚足足坐咗三個鐘，父女檔合作去完成美女與野獸城堡！ Angie都話估唔到小豆咁好耐力，好叻女！

出名顧家好男人嘅張頴康唔止係個好老公，更加係一個好爸爸！囡囡小豆第一日開學，親自揸車送返學！唔好以為只係第一日返學先咁隆重其事，張頴康喺Facebook表示，原本一直都係諗住安排囡囡坐校車返學，但係為咗同小豆見多啲、多啲時間相處，所以以後都會由自己管接管送！

張頴康補充，雖然真係瞓少咗好多，不過佢就話做人父母係咁㗎啦，為咗囡囡幾辛苦都值得，真係好sweet啊！好多時做咗父母先至會明白，究竟爸爸媽媽為咗自己嘅仔女付出同犧牲咗幾多！父母嘅愛永遠係最偉大！

早前張頴康宣布太太陀第二胎，預產期10月。原本兩夫妻想低調唔公開陀仔定女，不過就喺出席活動時被小豆踢爆係細佬！一仔一女湊夠一個好字！