大頭照從官網藝人名單消失 蔣志光疑約滿離開TVB

蔣志光喺《白色強人》爆seed講英文成為經典一幕
蔣志光喺《白色強人》爆seed講英文成為經典一幕

效力TVB 31年嘅蔣志光,近日被發現喺TVB官網嘅藝人名單之上不見蹤影,因此有報導指舊年已約滿嘅阿蔣,懷疑未有續約,結束31年賓主關係。有傳媒向阿蔣求證,但佢未有回應。如果消息屬實,拍好未播嘅《破毒強人》將會係蔣志光喺TVB嘅告別作。

61歲嘅蔣志光,80年代加入樂壇以歌手身份出道,到1990年同韋綺姍合唱嘅《相逢何必曾相識》成為代表作。1991年蔣志光簽約TVB拍劇兼做主持,1997年至99年期間一度離巢。

蔣志光
蔣志光
編劇喺《降魔的》系列打造出「蔣志光的平行宇宙」
編劇喺《降魔的》系列打造出「蔣志光的平行宇宙」

蔣志光多年來演過唔少經典角色,包括《真情》嘅李添福、《男親女愛》嘅詹士安、《降魔的》嘅莫有為等。佢喺《老表,你好hea!》入面演嘅高音,有一幕自彈自唱《愛是永恆》嘅戲份,令唔少年青觀眾驚覺蔣志光原來係歌手,佢亦憑呢個角色贏得台慶頒獎禮最佳男配角。而喺《降魔的2.0》入面,蔣志光一人分飾四角,其中三個角色分別係佢喺《鬼同你OT》、《實習天使》及《情越海岸線》入面嘅角色,有網友話蔣志光創造出同Marvel宇宙一樣嘅平行時空!

因為喺劇中唱歌,唔少人先知蔣志光原來係歌手
因為喺劇中唱歌,唔少人先知蔣志光原來係歌手

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!