「大馬女神」林宣妤家族擁有超優良基因 家姐同哥哥都同明星撞樣？

正在熱播中嘅無綫劇集《反黑路人甲》，搵嚟好多靚女演員参演，當中包括飾演蔣家三小姐蔣千惠嘅林宣妤（Serene），唔少觀眾對佢可能有啲陌生，因為今次只係佢第二套有份參演嘅劇集，不過大家睇過佢嘅演出都大讚佢靚女及好有「仙氣」。今年5月已經離開無綫嘅林宣妤，現時已經返回大馬，更因疫情關係未有返香港為劇集宣傳。雖然Serene選擇返大馬發展，不過都有頻頻更新社交網站，一班粉絲仍然可以知道女神嘅動向。

林宣妤被譽為係史上最靚嘅華姐亞軍，屋企擁有超優良基因，佢有一個家姐、一個哥哥同一個細妹，個個都係靚仔靚女。日前佢就上載與家姐及哥哥嘅合照，並留言話：「經常被誤會我是家中的大姐 😂😂😂我是老三啊 #弟弟還是哥哥 #姐姐還是妹妹 #傻傻分不清」網民們除咗大讚林宣妤靚女之外，仲紛紛留言話佢哋家族基因強，例如：「基因强大」、「漂亮的基因很强」、「一屋子帥哥美女」及「高顏值家族」等等，甚至有網民話哥哥似台灣男神修杰楷同埋家姐似麥美恩。

現年24歲嘅「大馬女神」林宣妤，喺2017年參選華姐獲得亞軍後加入無綫，原本應該係以拍劇為主，《她她她的少女時代》係佢嘅處女作，其後再拍攝咗《反黑路人甲》及《使徒行者3》，不過就有指因為香港節奏及壓力過大而患上暴食症，今年5月正式離開無綫。林宣妤返回大馬後，繼續發展佢嘅演藝事業，早前就與張簡寧（Jens）拍檔主持新節目《 我的女神閨蜜 》。