大S徐熙媛逝世︳閃婚汪小菲 重遇舊愛具俊曄極哄動 曾戀周渝民藍正龍
大S徐熙媛戲裡戲外同樣敢愛敢恨,入行以來多段戀情都相當哄動。大S曾經與黑人陳建州交往多年,分手後二人仍保持友好,甚至同黑人太太范瑋琪都相當老友。范瑋琪曾自爆,黑人未同佢交往時,試過帶埋大S去接佢機。
之後大S拍攝《流星花園》時對同劇客串嘅藍正龍一見鍾情,即使藍正龍當時剛出道而且年紀細過佢,大S都勇於追尋幸福。不過雙方拍拖4年後傳出感情生變,大S仲喺主持《娛樂百分百》時喺鏡頭前向藍正龍提出分手。
《流星花園》大紅時,唔少fans都希望演杉菜嘅大S同演花澤類嘅周渝民喺戲外走在一起,結果2005年仔仔出車禍,最快去到現場嘅唔係仔仔當時女友許瑋倫,而係大S,因此令二人戀情曝光。原來拍《流星花園》時二人已經感情好好,到2004年拍《戰神》更令友誼昇華。可惜嘅係有傳性格內歛嘅仔仔同霸氣強勢嘅大S始終未能好好磨合,最終「大仔戀」只維持2年就分手。
2010年,大S徐熙媛喺台灣女藝人安以軒生日會上認識內地經營餐飲業嘅汪小菲,2個月內見面5次後大S同汪小菲決定閃婚。婚後大S於2014及2016年為汪小菲誕下一仔一女。不過到2021年11月二人宣布離婚,之後大S同汪小菲多次互指對方不是,大S曾發文爆汪小菲不忠、家暴,更因為財產分配對簿公堂,而汪小菲媽媽張蘭都不時「加入戰團」。
大S宣布離婚後數個月,突然喺2022年2月宣布同韓國前男團酷龍成員具俊曄結婚。原來多年前具俊曄到台灣宣傳時邂逅大S,更發展過地下情,但因為具俊曄公司嘅禁愛令而被迫分手。多年後,具俊曄得知大S宣布離婚,於是以多年前嘅舊號碼聯絡大S,令二人再次復聯並迅速結婚。婚後具俊曄同大S不時放閃,令人心痛係下星期就係大S同具俊曄喺南韓登記結婚3周年嘅日子,可惜大S同具俊曄已經天人永隔。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!