太古糖廠街巿集開鑼 「咖啡節」主題 Blue Bottle首次開pop up

·4 分鐘文章

糖廠街巿集似乎已經成為太古區嘅傳統,今年呢個巿集又開鑼啦!由11月到2月,將會有多間本地人氣咖啡店同食店開檔,提供即製嘅巿集限定美食,當中最矚目嘅一定係首次喺香港開pop up店嘅Blue Bottle 啦!

11-12月嘅主題係「咖啡節」,而下年1-2月則係「吃得有營綠色飲食節」。喺呢幾個月入面,將會有唔同舖位輪流開業,包保大家個個禮拜去都有新嘢試。即刻睇下巿集攤檔巡禮先~

Blue Bottle Coffee

必試巿集限定嘅Holiday Blend Pour Over!
Blue Bottle Coffee-必試巿集限定嘅Holiday Blend Pour Over!

粉絲應該好清楚,佢哋一向都好少會做pop up,負責人話今次首次喺香港擺pop up,係因為疫情關係,今年大家都攰了。見到有同咖啡相關嘅event,就希望可以參與,同大家一齊enjoy下咖啡生活!停泊喺巿集內嘅咖啡車,有招牌咖啡同窩夫小食供應,必試巿集限定嘅Holiday Blend Pour Over啦,帶有柑橘嘅酸香。窩夫就一如以往,外脆內軟,仲有粒粒砂糖增加甜度同口感。另外,更推出獨立包裝即溶咖啡,係日本之後第二個地區有得賣架!

Knockbox Coffee Company

專業咖啡師即場沖調巿集限定嘅mocktail咖啡:Autumn Breeze。
Knockbox Coffee Company-專業咖啡師即場沖調巿集限定嘅mocktail咖啡:Autumn Breeze。

另一架美食車就係Knockbox Coffee,有專業咖啡師即場沖調巿集限定嘅mocktail咖啡:Autumn Breeze,以Aromatic Espresso加入無酒精Gin酒同Tonic Water,柑橘果香中又滲有微微辛辣,層次豐富。另外有牛角包同幾款warp卷,方便進食。

Even0 Coffee Company

今次主要帶嚟剛果同巴拿馬嘅咖啡豆為大家沖調咖啡。
Even0 Coffee Company-今次主要帶嚟剛果同巴拿馬嘅咖啡豆為大家沖調咖啡。

呢個brand對咖啡迷嚟講可能幾新,但就絕對值得一試。佢哋係本地首間以車仔檔形式經營嘅咖啡品牌,今次主要帶嚟剛果同巴拿馬嘅咖啡豆為大家沖調咖啡。剛果嗰隻產地位於Blue Mountain,甜感度較高,車厘子味突出,仲帶有蜜糖香甜;而巴拿馬嗰隻就有較濃嘅熱帶果香同花蜜香。食物方面,則同Ethonia合作,每日供應幾款唔同嘅意大利小食,例如有芝士煙三文魚cracker、Parma ham芝士蟹肉cracker等。

All About Coffee

同4間唔同嘅café合作,推出各種手沖咖啡!
All About Coffee-同4間唔同嘅café合作,推出各種手沖咖啡!

All About Coffee則會一連4個禮拜同4間唔同嘅café合作,推出各種手沖咖啡,包括Favilla Café、Urban Coffee Roaster、Café Revol同Mandy Mok合作。

Nomad Burger

 現場即製多款特色漢堡。
Nomad Burger-現場即製多款特色漢堡。

人氣漢堡店Nomad Burger亦有參與,現場即製多款特色漢堡,包括龍蝦安格斯漢堡、龍蝦牛油果芝士漢堡等。麵包軟熟,龍蝦煎得幾香口,相信會係好多朋友仔comfort food ,配埋冷泡咖啡都幾滿足。

KALA Toast

巿集限定嘅立方包!
KALA Toast-巿集限定嘅立方包!

以彩虹吐司聞名嘅吐司小店,招牌吐司同各款口味嘅吐司當然有賣啦,另外有幾款巿集限定嘅立方包,特別推介韓式牛肉蛋立方,配搭幾match,牛肉香口而蛋亦炒得夠滑。

口感酥脆嘅蝴蝶酥Pretty Palmiers
口感酥脆嘅蝴蝶酥Pretty Palmiers

其餘檔位包括主力供應蛋包飯嘅貓之眼;口味創新、口感酥脆嘅蝴蝶酥Pretty Palmiers;同埋即沖健康咖啡同可可粉品牌Ms Kinny等等。而12月則會有Ask For Alonzo、甜筒暉、The Coffeology同Winstons Coffee等。

糖廠街巿集
地點:鰂魚涌太古坊一座地下
日期:2020年11月2日至27日及12月1日至18日 (逢星期一至五)
時間:8:00 - 15:00