【太太不敵癌魔】妻患病TVB唔續約 古天樂張衛健撐林子博渡難關

藝人林子博去年遭逢人生考驗，太太Shirley患上罕見癌症，而TVB就決定唔同佢續約，雙重打擊之下子博仍然撐住。

近日Shirley病情出現反覆，多次來回醫院，今日早上子博在facebook透露太太離世的消息。「外父外母，請原諒我沒有好好照顧你們的女兒。你們已團聚了嗎？老婆，我會照顧好詠渝、卓楠！你放心走吧！愛你！」。圈中人同網友都留言致哀。

早前林子博喺訪問提到，當日太太有事、自己又食咗TVB「無情雞」，喺人生處於最低潮之際，突然有好多圈中人出現伸出援手。子博做咗11年娛樂新聞主播，訪問過好多藝人，看似平平無奇，原來好多受訪者知道佢出咗事，都第一時間出嚟撐佢。

子博最感到意外係收到張衛健嘅錄音短訊，表示知道發生咩事，打氣話「唔需要擔心，一定過到，大帥哥撐你」，又另外錄口訊俾Shirley，令佢地感動到流淚。子博又憶述，收到不獲TVB續約消息後仍然要開工，好多人慰問佢太太，但又唔能夠話俾人聽就快失業，有苦自己知，後來經傳媒報導，唔少同行都打電話問有冇嘢幫手，甚至介紹工作，令子博暫渡難關。

另一個估唔到會伸出援手嘅，係子博初出道時拍港姐宣傳片而認識嘅古天樂。原來古生得知消息後，透過演藝人協會搵到子博嘅聯絡方式，之後親自致電了解，並且提供財政支援。