女友生日只送「心意」Ian自爆成年冇出糧

人氣男團MIRROR密密接Job冇停手，但成員Ian昨日出席活動時竟自爆「冇糧出」，對上一次出糧已是年初的事！他笑言自己慳家夠使，連女友生日都只是送「心意」。

Ian昨日到中環出席珠寶品牌活動，吸引大批粉絲撐場，穿黑色西裝型爆登場的他戴上近40萬首飾，現場粉絲瘋狂尖叫！問到今次出席活動的酬勞可有加碼？他笑說：「其實我都唔清楚，都係交畀公司決定，如果快啲出糧就好，講笑啫！」並自爆上一次出糧已是今年年初，問到儲蓄是否夠用？他笑說：「要慳啲使，好彩平時冇乜大使費，最大開支都係用喺屋企，例如送禮物畀屋企人或者裝修。」

講心唔講金

他現時與混血索模盧慧敏（Amy）熱戀，拍拖是否很大使費？他說：「唔會，都係食飯為主。」提到Amy日前生日，如何慶祝？他笑說：「都係簡單為主，有送心意、祝福。（即係冇禮物？）有禮物嘅，心意啦！物質生活唔重要，衣食住行應付到就得。（佢接受？）OK，我哋講求心靈上嘅。」

近日有Rapper出歌狂踩MIRROR，他表示：「有聽過朋友講，音樂係可以好自由表達意見嘅渠道。（佢覺得有成員只靠樣冇實力？ ）首先我多謝佢覺得部分成員靚仔，除咗表面上靚仔，其實私下佢哋都付出好多努力，我哋有上堂學唱歌，希望可以畀大家睇得出努力過。」並直言不會為此生氣，因為每個人都有權表達意見，他亦沒想過要平反。