女子2年前面書上鬧前夫「白痴」 入境杜拜竟被捕

「君子相分,不出惡言」,原來唔止為咗保持風度,有時仲係自保之計。   55歲英國婦人Laleh,幾年前同結婚18年嘅葡萄牙籍銀行家前夫離婚。2016年,佢知道前夫喺離婚後僅僅半年就同新歡結婚,嬲到喺facebook出post鬧前夫係「白痴」(idiot),仲鬧埋前夫嘅現任太太al Hammadi醜樣(horse)。

最近,前夫逝世,Laleh帶埋二人所生、14歲嘅女Paris去杜拜出席喪禮,點知喺入境嘅時候被拘捕,護照被扣起,Paris就獲准回國。   原來al Hammadi以當年鬧佢地嘅post,向當地政府告發Laleh觸犯網路罪行法。而家Laleh面臨起訴,最高可被判監2年及罰款5萬英鎊(約港幣$512000)。   即使Laleh個post係3年前喺杜拜以外地區出,都一樣有中招嘅機會。

杜拜有好嚴格嘅網路罪行法,有人權專家就批評,即使係遊客,多年前喺境外出嘅社交媒體發文,都可以成為入罪證據,無疑係令所有人都成為罪犯。   無端端被扣留,Laleh表示精神壓力極大,又擔心冇人照顧個女,唔知點算。   成件事最得人驚嘅,唔止係呢條以言入罪嘅法例,而係用個post報仇嘅心態!原文傳送門