奶奶先斬後奏剪囡囡頭髮 網民:真係厚多士!

親子王國 Baby-Kingdom.com

撰文:飛天中女Juicy媽

【親子王國分享】

好多阿媽都唔鐘意人哋插手自己小朋友嘅造型,特別係女仔嘅頭髮!Forum度有網民講話,自己細心打理咗囡囡把長髮,個個月修剪先出落得又長又直。不過奶奶就覺得長頭髮難洗又難乾,好難打理。成日叫樓主幫囡囡剪短佢,有日仲唔聲唔聲帶咗小朋友去剪!



咁又過份啲喎,講還講,唔好直接郁手先得架!有網民問:係咪平時奶奶照顧開,覺得麻煩啊?但原來又唔係喎,根本就唔同住,個女都係樓主自己湊返。咁剪咗阿女啲頭髮呢個舉動,真係純粹厚多士喇!

做緊媽媽嘅網民大多數都理解樓主心情,之不過唔剪都剪咗,就唔好唔開心咁耐,奶奶都係出於關心同一番好意。小朋友頭髮長得好快,剪一剪髮質仲靚啲添。最重要係阿女都睇得開,冇話剪咗之後唔開心,咁咪當轉下造型,唔好執著囉。最多教佢以後要識拒絕,唔好奶奶話咩就係咩。

不過都有人道出重點,其實唔係把頭髮長定短嘅問題,係奶奶先斬後奏,根本冇尊重過自己。同埋喺奶奶心目中,就係覺得佢搞個孫都唔使同個阿媽交代一聲。有一次就會有第二次,以後仲可能玩埋其他嘢啊!

咁我都唔同意搵奶奶理論,或者同老公反映嘅。不過就可以教識囡囡,當父母以外嘅人決定帶佢剪頭髮,或者做其他嘢,都要講「我要問吓媽媽先」,總之唔好即刻去做。咁就唔使自己出面同奶奶嘈,一陣佢一哭二鬧三上吊都好煩架嘛。

奶奶出於好意又好,自把自為都好,我諗冇阿媽會鐘意人哋踩過界。改變唔到人哋,唯有教自己囡囡點應對~

入去討論區一齊傾


即睇下一篇:超級奶爸何基佑新書:學識育兒管教系統好重要!

其他內容