【好久不見】劉美娟同代花旦合照 黎美嫻淡出做院牧

早幾日劉美娟喺微博post咗一張飯局合照，除咗老公張崇德之外，鄧萃雯、楊羚、劉美娟同黎美嫻呢班八十年代TVB花旦都出現相中，勾起唔少人嘅回憶？呢批陪過我地「電視撈飯」嘅女星近況係點？

劉美娟

參加健美小姐入行，2001年同張崇德結婚，2005年大仔天藍出世後夭折，至2014年裁定有關醫生專業失德。現時劉美娟同張崇德育有13及11歲仔女，劉美娟主力照顧家庭，曾經喺電台開咪，前年拍過TVB劇《飛虎之潛行激戰》。

黎美嫻

1985年出道，拍過唔少古裝劇，包括出道冇耐就擔正嘅《倚天屠龍記》。由於造型有古典美，黎美嫻喺台灣都相當受歡迎，仲試過過江拍台劇。1996年信奉基督教後淡出娛圈，訪問中提到因為宗教理由而推咗好多套戲，接拍古裝片又被要求唸佛，於是決定唔接戲，其後到教會當院牧。2005年黎美嫻同有「元朗舖王」之稱嘅男友謝興肇結婚，繼續教會服務，閒時與劉美娟、陳法蓉等好友茶聚，好寫意！

鄧萃雯

因為劉德華提名而入讀藝員訓練班，第一套劇《薛仁貴東征》就做女主角，90年代一度赴美進修，回港後改簽亞視，到1999年重返TVB。憑《金枝慾孽》如妃一角成為視后大熱，結果輸俾同劇嘅黎姿，但係憑《巾幗梟雄》及續集冧莊視后。2012年拍完《金枝慾孽貳》之後再次離開TVB，主要北上拍劇，前年《多功能老婆》本來屬意雯女演女主角藍飛，後來佢選擇接拍Viu TV《婚內情》。

楊羚

八九十年代TVB「御用細妹」，大部份角色都有阿哥家姐照住，最印象深刻嘅應該係《大時代》方敏一角。1997年拍罷《大鬧廣昌隆》後冇再拍TVB劇，2000年結婚後育有一對仔女，間中參與主持工作，上年幫有線《30分鐘大放餸》做嘉賓。

劉倩怡

電台出身嘅劉倩怡同上面幾位花旦因為宗教聚會而相識，時間上遲過佢地加入TVB，而當時劉倩怡主要係做主持。後來劉主力參與教會媒體工作，近年重返咪前為港台主持節目《恬淡情懷》。而劉倩怡同老公「音樂情人」鄭子誠結緣亦都因為喺港台一齊主持節目。