【如花中風】星爺中學同學 李健仁扮醜女走紅 走水貨搵食斷正

周星馳電影其中一位綠葉「如花」李健仁，去年喺內地中風送院，有指佢右半邊身癱瘓，語言能力亦受損，之後已經返港治療。李健仁喺微博出post交代近況，表示最近努力復元中，正接受各種治療，並且感謝「大劉」劉鑾雄太太甘比以及演藝人協會會長古天樂出錢出力支持，亦多謝Viu TV演員Suzuki李健邦為佢奔走。

59歲嘅李健仁因為如花一角而成名，但係原來入行前佢嘅人生都相當精采。

李健仁嘅爸爸李有棠係嘉禾電影嘅攝影師，自細仁哥就出入片場，自然想投身影圈，但係深知電影工作辛酸嘅李父當然反對。李健仁有個中學同學，家境麻麻唔多講嘢，最鍾意功夫同埋李小龍，佢叫做周星馳。呢對朋友中學畢業之後投身社會，周星馳做文職，李健仁去咗甲組球會愉園做守門員。

因為周星馳，李健仁畢業之後認識到2位新朋友，一個喺鞋鋪打工，叫梁朝偉；另一個叫戚美珍！4個人試過開鋪頭，又會一齊夾錢去玩，後來除咗李健仁，3個朋友都先後考入TVB藝員訓練班，仁哥轉行做飲食業，試過月入5萬但唔滿足，於是轉行做電影，由場記開始從頭做起。

1992年喺北京拍《武狀元蘇乞兒》嘅周星馳搵李健仁上去玩，有日叫佢去片場幫手，原來係埋位做「蘇乞兒朋友個阿姨個妹」，首次以醜女形象見人。

2年後嘅《九品芝麻官》「如花」一角成為李健仁家傳戶曉嘅角色，並且多次喺星爺嘅電影以醜角出現。幕前愛將之餘，仁哥更成為周星馳嘅公司製作人之一，得意之作包括為《喜劇之王》選角時相中張柏芝，以及將心中以足球為主題嘅電影意念，引發星爺創作出《少林足球》。

2003年李健仁投資開名牌手袋店「如花」，但係撞正沙士，慘蝕幾百萬收場。後來李健仁亦有為生活走水貨，有報導話佢喺2008年試過俾羅湖海關扣查。近年李健仁北上發展，拍過多套網路電影。仁哥早婚，三個仔女已經出身，二女仲係醫生，犀利！