姜濤緋聞女友 Candy黃曦誼16歲同姜B拍廣告

今日有傳媒爆料，自稱未拍過拖兼係處男嘅姜濤，原來今年情人節前夕疑似同女Model Candy(黃曉文，藝名黃曦誼)夜遊中環，2個人喺同一地點影相兼IG出post而露出破綻，但係亦都懷疑佢地轉個頭就喺情人節嗌交分手收場。Candy事後發文話自己「乖嘅女仔會畀人玩，仲係一次二次」，而姜B喺情人節做直播show亦都冇厘精神咁款，甚至有網民喺直播網頁留言問姜濤「搵返Candy未」。

今年19歲嘅Candy，2018年開始參與幕前演出。外界都以為Candy同姜B以及另一MIRROR成員Ian(陳卓賢）兩年前因為拍音樂短片《戀愛要在生日前》而認識。不過翻查資料，2018年Candy16歲嗰陣接拍一個護膚品廣告，對手正正係剛剛贏到《全民造星》冠軍嘅姜濤。

仲讀緊書嘅Candy已經簽咗經理人，但係幕前工作唔算多，大多數係平面廣告，亦有拍過港台劇集，喺許志安《教我這麼愛下去》MV，Candy同年紀大佢一截嘅莫竣名(Louis）演情侶。

最近ViuTV播放嘅開台5週年單元劇《YOLO的練習曲》，Candy亦有份參與演出女團YOLO成員，甚至喺第一集擔正。Candy同Viu有合作，唔知係咪就係佢同姜B呢段疑幻疑真戀情嘅契機呢？