姜濤表妹被「姜糖」爭住集郵 獲網民讚似苟芸慧及鍾麗緹混合體
香港人氣男團MIRROR出道3年,人氣一直有增無減。除咗香港之外,海外都有唔少粉絲為佢哋舉辦應援活動,實行出力支持!日前(13及14日)「加拿大姜濤應援團」為姜濤喺溫哥華時代坊中庭舉辦「姜濤出道三週年溫哥華相展」,姜濤表妹Angelina Dean楊佳琪都有到場撐表哥,期間更被「姜糖」認出兼爭住集郵。
現年21歲嘅Angelina係中英混血兒,比姜濤小一歲,喺加拿大成長並畢業於加拿大英屬哥倫比亞大學。前年Angelina參加《溫哥華華裔小姐競選》,可惜五強止步,未能代表溫哥華前往香港參加由無綫舉辦嘅《國際中華小姐競選》 ,差少少就同表哥姜濤打對台。其實Angelina兩年前已經出現喺姜濤IG嘅live,佢外貌標緻加上滿瀉嘅仙氣,當時令到唔少網民心心眼,兼話佢似女神苟芸慧及鍾麗緹嘅混合體。另外,喺前年Angelina亦曾經到香港探親,期間暫住姜家,姜濤充當導遊帶表妹周圍食周圍玩,全程佢哋都以流暢嘅英文溝通,當時唔少網民更驚訝姜濤嘅英文能力。
雖然Angelina未有加入娛樂圈,不過佢成為咗YouTuber,間唔中上載日常生活影片與網民分享,而早兩日佢亦發佈「KT CANDIES VANCOUVER MEET N GREET X PHOTO EXHIBITION RECAP」影片,片段可見Angelina深得「姜糖」歡迎。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!