姜濤都係Fans！ Tyson Yoshi藝名同牛肉飯有關？ 氹女友情歌有1千萬次播放

前晚同姜濤、林家謙、Jer柳應廷同Tyson Yoshi（TY）一齊演出拉闊音樂會，展示新一代港產歌手嘅風格。姜濤、林家謙同Jer各自有一定發展，唔少人都係因為拉闊而認識Tyson Yoshi。查實TY作品喺Youtube都有唔少人聽過睇過，喺台灣嘅發展可能更勝其餘三子，就連姜濤都係佢fans！

Tyson Yoshi並唔係日本人！佢原名叫程浚彥，細個就去咗英國讀書，當然因此接觸唔少西方音樂，包括奠定佢作品風格嘅R&B同 Hip Hop。2018年佢開始發表自己創作嘅歌曲，出道作To My Queen係佢有次同女友嗌交之後寫嚟氹返對方。後來TY亦寫咗另一首俾女友嘅歌，直情係以女友個名Christy命名，因為Christy話To My Queen唔夠度身訂造！而Christy本身都喺IG有名氣，個人帳戶就有超過3萬人追蹤。

至於Tyson Yoshi呢個名點嚟？TY想以呢2個字母砌個名喺音樂圈發展，首先諗到叫Tyson，後來喺屋企望出窗外見到日式牛肉飯快餐店招牌上嘅Yoshinoya，靈光一閃決定加埋Yoshi，個藝名就係咁嚟。

TY嘅作品喺香港同台灣獨立音樂界幾受歡迎，Christy嘅MV已經有過千萬次觀看，另一首歌I Don’t Give A 都有過百萬點擊，可能勝過唔少主流歌手。

話說姜濤好鍾意Tyson Yoshi嘅歌Something，於是年初透過花姐搵TY合作，但係TY認為當時人在台灣難以同姜濤坐低傾，而且冇興趣幫人製作歌曲但係自己冇份唱，於是就介紹Something嘅作曲人Gareth T俾姜B，成就出MasterClass呢首歌。而姜B亦喺拉闊影Poster當日，同Tyson Yoshi打招呼兼「表白」有幾鍾意TY嘅歌。

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！