【娛圈最強家族】曾志偉一家各有成就 兩父子贏過金像獎 表哥原來係馬時亨！

剛剛上任TVB副總經理嘅曾志偉，呢期真係公事家事兩頭忙喇！細仔曾國猷被傳媒披露已經離婚，而前妻張可蕙(Renee)就喺IG post相晒同新歡食飯拍拖親密照。Renee之前已經被指喺網上數臭奶奶，又同曾國猷網上公開罵戰，仲留言話係睇在老爺係曾志偉先嫁。而剛剛TVB CEO李寶安向內部發通告，宣布「星夢娛樂」話事人何哲圖離任，曾志偉會睇埋音樂製作。

「獎門人」而家可以話係TVB關鍵人物之一，其實佢地一家喺演藝界都各有成就！

曾志偉

成就唔駛多講，龍虎武師出身，後來轉型做演員同導演，對八九十年代香港影圈具有影響力嘅電影公司－新藝城同UFO都係曾志偉有份，幕前演出拎過香港電影金像獎影帝（1991年《雙城故事》）同最佳男配角，近年協助唔少新晉電影人開戲，《一念無明》就係其中之一。電視方面，1990年喺亞視主持《開心主流派》，《開心字典》環節條橋近年都仲有人玩緊，《獎門人》系列拍足20年都係收視保證，而家仲入埋TVB做管理層執整綜藝節目，67歲都仲喺娛樂圈咁有影響力，難得。

曾寶儀

曾志偉同前妻王美華所生嘅大女，香港出世但係台灣長大，台大畢業之後入行由幕後製作做起，因為宣傳節目而參與綜藝節目演出，被台灣演藝界一姐張小燕相中簽做藝人，自此成為當紅主持人，仲唱埋歌出唱片。但係20年前曾寶儀人氣最勁之際，同另一位當紅主持人黃子佼傳出戀情，被指係介入黃子佼同小S嘅第三者，因此備受批評。後來曾寶儀轉向內地發展，亦都重返幕後崗位做電影製作人。

曾國祥

曾志偉同第二任妻子朱錫珍所生嘅大仔，喺加拿大讀完書之後入行，起初係做演員，直到2010年開始執導小品製作。2016年作品《七月與安生》令人眼前一亮，獲多個頒獎禮提名最佳導演。之後嘅《少年的你》更令曾國祥獲得香港電影金像獎及電影評論學會大獎最佳導演，仲代表香港入圍奧斯卡最佳外語片15強。曾國祥同拍拖多年嘅女友王敏奕前年結婚，而王敏奕而家都簽咗TVB合約。

寶媽（王美華）

同曾志偉17歲結婚，20歲離婚之後帶埋2個女返老家台灣生活。不過寶媽坦言同曾志偉離婚之後反而成為朋友，甚至幫曾志偉照顧喺台灣嘅屋企人。寶媽因為曾寶儀走紅而為人認識，慢慢有電台同電視台節目主持工作邀請，但近年健康麻麻，更加三度患癌。

曾勵珍

早排曾志偉空降TVB，我地都有報導過，多位高層之中曾勵珍最冇有怕，因為珍姐係獎門人嘅堂家姐！曾勵珍入TVB做編導之前，曾經喺香港電台做播音員兼節目主持。順帶一提，港府前高官馬時亨原來係曾志偉表哥，呢個家族網絡真係冇得頂。

譚詠麟

校長同志偉好friend係人都知，兩個人原來細細個就識。志偉爸爸曾啟榮同校長爸爸譚江柏以前喺廣州一齊做交通警，收工又會一齊踢波，所以會帶埋曾志偉同譚詠麟去球場玩，兩家人感情好，獎門人同校長可以話係兄弟手足。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！