娛美人:跨過「瓶」頸 減薪單飛 Kerryta挾41吋腿封神 唔敢選美

·2 分鐘文章
Kerryta打算花多4年時間在樂壇努力,只求將來無悔!
Kerryta打算花多4年時間在樂壇努力,只求將來無悔!

環球前樂隊Dusty Bottle的靚女主音Kerryta,有前港姐周嘉玲的影子,本可選擇「選美」為成名捷徑,但她偏偏捨易取難,踏上最冇「錢途」的歌手路,更不介意由月入10萬元「減薪」至5位數,為追夢捱窮也值得!

Kerryta單飛發展前是樂隊Dusty Bottle的主音,無奈生不逢時,成軍不久便遇上疫情,4位男成員各有發展,要求離隊,結果成軍2年便淪為「一碟樂隊」。早前剛推出個人新歌《心野》的她說:「樂隊連埋我有5位成員,但隊友人各有志,大家喺有共識下決定解散,都尊重佢哋意向,但覺得好可惜。」追夢出師不利,但做歌手的心不死,今年她決定孤軍作戰,用多4年時間投放樂壇,以青春換無悔:「一入行就預咗歌手條路好難捱。」

曾月入6位數

做全職歌手前,她曾是月入6位數的高薪Slash(斜槓工作者),可自給自足過優質生活:「Slash即係1個人有3、4個身份,我做過Event planner、Freelance Model同歌手等,仲有玩吓股票咁啦!依家做全職歌手,收入唔穩定,好在唱片公司幫我接吓Model工作,最近做咗運動品牌香港代言人,仲有個意大利絲襪嘅Job,平均1個月有過萬蚊收入嘅。(做咗絲襪女神?)女神就唔敢當,不過唔度都唔知,原來我腿長41吋!」

怕醜驚着泳衣

談及與前港姐亞軍周嘉玲撞樣,她直認有少少似:「佢好靚,似佢好開心。」問到可想過選美入行?她坦言自細已被家人及親戚游說選港姐:「讀小學嗰陣,佢哋已經問我有冇興趣選美,但我真係冇呢個諗法,因為要着泳衣,我對身材冇自信,加上好怕醜,咁又點參選呢!」

如此靚女,意外的是她的追求者不多,她說:「啲人成日問樂隊啲男成員係咪追過我,我可以講,一個都冇囉!朋友話我唔笑嗰陣有『厭世臉』喎!好有距離感,其實我唔係咁惡。」而她心目中的男神是方大同,大讚對方有才華,可惜入行後無緣見面。

Profile

身高:1米68

體重;48kg

興趣:發掘好食餐廳、Fashion、音樂、藝術