婚外情!十個男人九個肯 鄒兆龍撞正高危「枕邊人」

Nuts哥
東方日報
婚外情!十個男人九個肯 鄒兆龍撞正高危「枕邊人」
婚外情!十個男人九個肯 鄒兆龍撞正高危「枕邊人」

【東方日報專訊】武打影星鄒兆龍近日行正衰運,唔只被爆料小三開咗個名為「鄒兆龍出軌記錄」嘅微博大爆陰毒,據佢老婆翁為德發聲明所講,佢仲喺美國撞車添!嘩,婚姻出軌啫,唔使真係以撞車作為懲罰呀?何況講到背妻偷食,娛樂圈大把呢類前車可「尷」嘅人辦,鄒兆龍只不過係喺事件曝光後,衰忍唔住道氣,發表「雞屎論」,話雞會生蛋又會拉屎,「很多人放着蛋不吃,整天追究屎」,親身示範「沒有最瘀,只有更瘀」,引發一地花生!但唔怪得佢喎,因為佢唔知啲蛋唔係攞嚟食,而係畀佢攞嚟碌散啲瘀血o架嘛,要食就食雞屎藤茶果啦!

老婆旺夫 有錢就身痕

講真,如果唔係呢單嘢,真係唔係好多人知鄒兆龍係乜水,醒番起佢原來就係《九品芝麻官》個大奸角「常威」,坦白講,當年翁為德貴為最上鏡小姐、十大名模,鄒兆龍就只不過係十二線藝人,難得人哋都肯紆尊降貴,嫁雞隨雞,仲安心相夫教子淡出幕前,甚至旺夫旺到個老公去埋荷里活,拍到奇洛李維斯孭飛嘅《廿二世紀殺人網絡》,點解都仲咁唔生性,走去玩扮盲人按摩,兼夾仲畀條女影埋相呢?呢啲就係人性喇!「男人有錢就身痕,女人身痕就有錢」,好似暴龍哥話齋:「用荷蘭豆炒豬歡喜」一樣,呢個係定律嚟,記住呀!

婚外情呢家嘢,十個男人九個肯!但連底褲都幫小三洗埋,仲要「放在我旁邊陪着我」,就唔係個個做得出!呢種脫胎自《紅樓夢》「癡女兒遺帕惹相思」嘅才子佳人手帕定情,再加少少意淫嘅手法,出自向來Man爆「一膽、二力、三功夫」嘅武行佬身上,粗中又有細,難怪小三「長苦為何不肯短痛?全因為難棄這情種!」仲要冇晒矜持,寫出心聲:「我怕愛上你 陷進去 好累的 愛一個人特別累」,其實呢啲嘢男人一早知,陷晒進去當然累,唔係點會有句說話叫「九淺一深」?至於,愛一個人特別累,更加係不能同意更多,所以咪愛多幾個囉!

女能覆「鄒」有辦你睇

但水能載舟,亦能覆舟,女都一樣!你唔信女能令男人覆舟,家陣都信女能覆「鄒」喇啩!有幾多個可以好似披頭四已故成員約翰連儂咁,將搞婚外情嘅體會,寫成一首《Norwegian Wood》咁才情橫溢呀?唔抵得佢咩?惡搞佢首《Imagine》囉!「You may say I'm 賤男!But I'm not the only one!」

如果鄒兆龍面對婚外情誘惑,都可以好似佢喺微博貼出史泰龍主演電影《逃亡大計》系列最新一集嘅劇本,再留言:「不好意思,不接!荷里活電影不一定要像乞丐要飯甚麼都吃」,依家就唔會落入一個偷食唔抹嘴,廿一世紀被高危枕邊人連插幾鑊,仲要偷雞唔成食雞屎嘅尷尬局面!

 

 

是日精選

柯震東傳被列入-劣跡令-害慘劇組虧上億人民幣-
自爆見過新歡張寶兒家長-袁偉豪被翠如讚-女人湯圓-
陳茵媺復工-夫妻檔廣告-陳豪拒結紮-遲幾年再造人-
疑似李曼筠-照網上瘋傳-
樂瞳狂飲奶升cup否認僭建-
宿敵勁爆海豚音獲激讚-celine遭評判狠批-爭入agt決賽蒙陰影-
瞞唔過大狀林作-典型講大話模式
36g麥紫莉老作拍av遭藐爆圍插-
杜汶澤請爆乳女抹地換水-
袁嘉敏呻百人問價被屈陪客-
婚外情-十個男人九個肯-鄒兆龍撞正高危-枕邊人

其他內容