嫁公屋男悔恨一生?網傳「避公屋男釣金龜」攻略

嫁公屋男悔恨一生?網傳「避公屋男釣金龜」攻略
嫁公屋男悔恨一生?網傳「避公屋男釣金龜」攻略

撰文:飛天中女Juicy媽

【親子王國分享】個個都釣金龜,唔通個個都想釣金龜咩?最近碌到個post講話嫁公屋男就一世後悔,做父母嘅應該由一開始就杜絕呢個可能。仲提供唔少實用招數,由淺入深,真係好過癮架。例如:旁敲側擊咁Chok吓個男仔興趣同居住空間、帶個男仔行山觀察以佢嘅性格同眼界。(詳細自己撳文尾條link睇喇)



呢個post邊有可能唔hit呀,咁Juicy嘅話題點少得Juicy媽!其實又唔可以話作者係立心不良嘅,雀仔都識擇木而棲,人梗係想向高處望喇。有人話結婚後係女人嘅第二次生命,遇人不淑分分鐘仲衰過做女時幾錢重。又啱嘅,有邊個想自己個女嫁得唔好,餐搵餐食餐餐清呀?有啲女仔娘家係私樓,點知嫁完要住公屋仲要同長老同住,真係諗起都覺得陰公。

之不過,係咪避開公屋男就叫嫁得好?咁諗就真係太天真喇,因為呢個世界有樣嘢叫潛、力、股!佢出生於公屋,唔代表一世都住公屋架啫。網民話齋,好多時家境一般嘅男仔先最上進,識慳錢識投資已經贏人幾條銜。倒轉嚟講,富二代又如何,敗家敗到瞓天橋底都有份呀。

可能有人會話我仇富又好酸喇。對於一心打算釣金龜嘅人,只可以講,畀你分到邊個係金龜咁又點?你揀人時人都揀緊你,不如努力充實吓全家嘅生活質素同埋涵養,到時先有得木門對木門架嘛。仲有呀,女人幾時都唔好靠晒男人,個女都要返咁上下有能力先有選擇權。

計我話,等個女出世先嚟籌劃實在太遲喇。嫁得好唔好都睇命水架嘛,你睇吓黎明而家個老婆(冇惡意),就知道外表同才藝根本唔重要。不如贏在射精前,擇個吉日再造人好過啦。

即上討論區一齊傾


即睇下一篇:【兒歌好處多】揀咩歌畀仔女聽?SEN小朋友點樣專心聽歌?創作人:聽母語最好!

你可能還想看