季前賽｜193哭成淚人向劉錫賢道歉 演技令網民刮目相看：而家知你咩料喇！

以籃球為主題嘅ViuTV原創劇《季前賽》，由張繼聰、MIRROR成員姜濤、呂爵安（Edan）、陳卓賢（Ian）、邱士縉（Stanley）、ERROR成員郭嘉駿（193）及梁業（肥仔）等人主演，成為鏡粉和錯粉必追劇集。網民們都有讚劇中演員演技，當中包括193。

上星期五嘅劇情就講到光仔（193飾）喺幾年前與損友一齊去打搶劫士多，而士多老闆敏叔（劉錫賢飾）喺追佢哋期間撞車受傷，事後光仔被判入獄。喺放監後，光仔仍然感到非常內疚同慚愧，所以多次喺士多外偷望敏叔。光仔其後去到一間餐廳見工，失敗後又被警察截查，先後因更新人士身分被歧視。

之後，光仔去到朋友嘅夜冷舖打工，敏叔突然出現搵佢上門收買舊款電視機，光仔因出於內疚而出900蚊收買電視機，之後敏叔就讚佢同請佢飲汽水。光仔以為敏叔唔認得佢，不過其實敏叔係認得，同埋已經原諒咗佢。光仔頓時聲淚俱下向對方認錯，敏叔仲反過嚟安慰佢。呢一場戲真係睇到網民眼濕濕同心都噏埋。

呢個哭成淚人嘅193，同平時大家見到串串貢嘅193好唔同。193亦有喺IG兩度出PO：「其實呢個畫面，光仔呢四年每晚喺獄中瞓唔著都會喺腦海中重播。一瞌埋眼就自然會諗起敏叔瞓咗喺地上，生死未卜嘅場景。可能每晚諗起敏叔一次，有時瞓唔著又可能每晚重播十次。而我陪光仔睇咗二千次，喊到眼都腫晒。不過諗諗下我喊嘅原因可能係因為被人剪咗個髮尾，冇得標奇立異帶領潮流」及「「尋日行錯咗唔緊要，今日行返啱咪得囉，中間兜咗路，咪當見識下個世界囉。記住，今日嘅你，已經唔係尋日嘅你，過咗去嘅嘢，就留返喺過去。」呢番說話我覺得敏叔亦都係同緊193講，又或者其實套落每個人身上都可以。有時做錯嘢之後思考、改正，就當係上咗一課，沉澱過後再努力重新出發，總會見到另一個新世界。」

導演袁劍偉亦有喺IG出PO大讚193：「郭嘉駿：我真係估你唔到 同193 @deniskwok193 合作之前，對呢位人兄嘅印象同大家一樣，都係敢言丶硬淨丶寸寸貢，同咩都夠膽死。 直至今次合作，先發現原來佢有個感情豐富嘅內在世界。從193身上可以見到一種獨特嘅演員特質— Fragility，係一種好特別嘅脆弱性；同光仔一樣表面寸嘴搶口，但內心深處有著一份敏感。真係估唔到喺一個咁嘅外殼入面，竟然埋藏著咁樣嘅特質，依家真係知佢咩料啦！」

唔少網民都對佢演技刮目相看，紛紛留言大讚，例如「193 真係做得好好，完全感受到佢果種內疚，爆喊果幕眼淚好真，自然流露，我都感動到喊咗」、「謝謝光仔 謝謝敏叔 謝謝導演 謝謝33將光仔表演得咁好好感動」、「支持三爺！ 做得好好 好有意思嘅一幕、好動人嘅對白」、「演得好好」、「33演繹得好好，睇到心都實哂好委屈呀」、「而家知你咩料喇！呢場戲好驚喜！繼續加油光仔」、「對白很感人，2位演繹完美」、「對你改觀！呢個角色你演繹得好好 加油呀！」、「被光仔感動了」、「睇到眼濕濕」、「對敏叔果場哭戲，做得好好，很入戲，感動」及「睇一次喊一次, 敏叔嘅話，係由心關心光仔。而光仔嘅眼淚，係由心嘅內疚。」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！