雅虎香港新聞 
孤寒老公要N班仔帶病返學：畀咗學費，唔返學好蝕！
撰文:茄莉姨姨
【親子王國分享】
小朋友唔舒服，個個家長都會心急想佢快啲好返，返少一兩日學有咩所謂吖。有位網民出post提到，囝囝只係讀N班，咳咗好多日，老師都話好返晒先返學，偏偏老公竟然為咗錢要個仔夾硬返學，仲要黑口黑面：「畀咗學費，唔返學好蝕！」但原來呢個事例只係冰山一角，仲有好多地方令樓主好唔開心，覺得兩夫妻價值觀好唔同。
樓主同老公相處的時候，有好多細微位睇得出佢好孤寒，賺少一蚊或買嘢買貴咗就好似好大件事！一家人共同生活，互相買下嘢食嘢飲畀對方食好平常，但佢老公永遠只買自己，但就會飲埋樓主買畀工人姐姐嘅飲品！
除咗好緊張錢以外，呢位老公亦都無顯出男士風度，亦無盡爸爸嘅責任。照顧小朋友責任只會係樓主同工人姐姐負責，叫佢幫手襟住阿仔餵藥，仲用呢個理由拒絕：「做咩要我做埋『賓妹』個份？」已經知佢係一個怕蝕底，又無責任心嘅人。樓主仲形容佢：「樣樣嘢事不關己，如果食飯，佢可以完完全全舒舒服服咁食飯，唔理小朋友。」網民睇完呢啲行徑覺得佢老公好似攞著數同事，完全無感覺到佢認為自己有責任照顧家庭。
睇咗Forum咁多年，好多時候都見到媽咪們呻老公唔幫手，自己一個人肩負所有責任，特別係病嘅時候，無論係媽咪自己抑或小朋友有病，老公係咪有關心家庭？呢個時候就會見真章。如果係吃喝玩樂先會出現，一有事時就事不關己，如果真係要繼續走落去，咁就真係要好好溝通雙方對家庭嘅責任。
